Qostanaı oblysyna Pragadan segiz bas Prjeval jylqysy jetkiziledi

ASTANA. KAZINFORM – Bıyl maýsymda Qazaqstan Chehııa astanasy Pragadan 8 bas Prjeval jylqysyn ákelip, jersindirmek. Bul týraly Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev málim etti. 

«Qostanaı oblysy aýmaǵyndaǵy «Altyn dala» rezervatynyń kólemi 490 myń gektardy quraıdy. Ǵylymı jumystar júrgiziledi. Bastapqy ýaqytta 8 bas Prjeval jylqysyn ákelý, 3-4 jyldan keıin onyń sanyn 40 basqa jetkizý josparlanyp otyr. Ol úshin atalǵan rezervattyń materıaldyq bazasy jabdyqtaldy. Jabaıy jylqylardy jersindirý jáne qorǵaý jumystary bizdiń mınıstrliktiń qarajatynan iske asyrylady», - dedi Danııar Turǵambaev Ortalyq kommýnıkatsııalar qyzmeti alańynda ótken baspasóz máslıhatynda. 

Onyń aıtýynsha, Prjeval jylqysyn jersindirý úshin jaqyn mańda úı maly bolmaýy kerek. 

«Sondyqtan biz tańdaǵan jerdegi 50-60 shaqyrym mańaıda úı maldary joq. Sebebi úı jylqylarynan aýrýlardyń juǵý qaýpi bar. Elimizge ákelingen Prjeval jylqylary bir jylǵa deıin qorada turady, olardy jersindirý úshin 89 myń gektar shóp qory bar. Odan keıin jaıylymǵa jiberiledi, rezervattyń aýmaǵynda jylqylar úshin qorek qory jetkilikti», - deıdi ol.