Qostanaı oblysy jylytý maýsymyna qalaı daıyndalyp jatyr

QOSTANAI. KAZINFORM – Qostanaı oblysynda 2025-2026 jyldardaǵy jylytý maýsymyna daıyndyq belsendi túrde jalǵasyp jatyr. Energetıka jáne TKSh basqarmasynyń málimetinshe, búgingi tańda nysandardyń daıyndyq deńgeıi 66 paıyzdy quraıdy.

Qazandyqtardy jańǵyrtýǵa 1,4 mlrd teńgeden astam qarjy bólindi

Jalpy alǵanda, kommýnaldyq sharýashylyq nysandarynyń ortasha daıyndyq kórsetkishi – 66%. Josparǵa sáıkes jylý jelilerin jańǵyrtý qarastyrylǵan. Qazirgi tańda 29,4 shaqyrymnyń 19,9 shaqyrymy jóndelse, bul jospardyń 68%-yn quraıdy.

Sonymen qatar 112 qazandyqtyń 87-si tekseristen ótti.

«Jumystarǵa jabdyqtardy profılaktıkalyq tekserý, tozǵan elementterdi aýystyrý, sondaı-aq qazandyqtardy kúzgi-qysqy júktemege daıyndaý kiredi», – dedi vedomstvodaǵylar.

Otyn qoryn jasaqtaýǵa aıryqsha nazar aýdarylyp otyr. Jalpy qajettilik 431,4 myń tonna bolsa, sonyń 194,8 myń tonnasy jetkizilgen (daıyndyq deńgeıi – 45,1%).

Buǵan qosa, qazandyqtar qoımalarynda 11,9 myń tonna mazýt bar.

Jylý jelilerin jóndeýge, qazandyqtardy jańǵyrtýǵa jáne jabdyq satyp alýǵa oblystyq bıýdjetten 1,4 mlrd teńge, respýblıkalyq bıýdjetten 249,2 mln teńge bólindi. Bıyl eki blok-modýldi qazandyq pen eki jańa qazandyq alý qarastyrylǵan. Bul jylý kózderindegi apattardy azaıtyp, halyqty úzdiksiz jylýmen qamtamasyz etýge múmkindik beredi.

Basqarmanyń málimetinshe, jylytý maýsymyna daıyndyq jumystarynyń keshigý qaýpi joq.

Jańa maýsymda 19 JEO jylýmen qastamasyz etedi

Bıyl qaladaǵy shaǵyn qazandyqtar tsehynyń qurylymy ózgerdi. Buǵan deıin jeke ıelikte bolǵan úsh qazandyq («Altyn Arman 2020» JShS, «Rich Grýpp-2022» JShS jáne «BMK Bereke» JK) jylý kompanııasynyń qaramaǵyna ótti. Sonyń nátıjesinde qosymsha 4 299 abonent memlekettik kásiporyn qyzmetin alady.

Jańa maýsymda jylýmen 19 jylý kózi qamtamasyz etedi. Onyń ishinde – ortalyq JEO (tozý deńgeıi – 66%), JEO-2 (53%), №3 qazandyq (56%) jáne shaǵyn qazandyqtar tsehy (16 nysan, tozý deńgeıi – 34%) bar. Óndiristik qýattylyq 71,1%-ǵa júktelgen.

Budan bólek, eki mektep qazandyǵy jáne bir jeke qazandyq jumys isteıdi.

Qalanyń jylý jelileriniń uzyndyǵy – 256,3 shaqyrym, tozý deńgeıi – shamamen 60%. Bıyl jóndeýge 3,1 mlrd teńge baǵyttaldy, onyń 2,3 mlrd teńgesi – bıýdjet qarajaty. Qazir 10 iri joba iske asyrylyp jatyr. Olardyń qatarynda:

• JEO mazýt sharýashylyǵyn jańǵyrtý;

• ekologııalyq monıtorıng júıesin engizý;

• basty bý qubyrynyń rekonstrýktsııasy;

• qazandyqtar men ǵımarat shatyrlaryn kúrdeli jóndeý;

• ortalyq JEO-nyń qasbetin qala dızaın-kodyna saı jańartý jumystary bar.

Jumystardyń shamamen 80%-y aıaqtaldy. Alaıda alty magıstraldyq jelini rekonstrýktsııalaý jobasy (6 mlrd teńge) qarjylandyrylmaı qaldy. Sondaı-aq basty bý qubyryn jóndeý jobasy tek 10%-ǵa ǵana qarjylandyrylǵan.

Gaz baǵasynyń ósýine baılanysty kásiporyn 2026-2030 jyldarǵa arnalǵan tarıfti qaıta qaraýǵa ótinish berdi. Josparlanǵan ósim – 41,8%. Jaqyn aılarda ýaqytsha tarıf te kóteriledi – 2025 jylǵy 1 qyrkúıekten bastap 8%-ǵa ósedi.

Jylý jáne ystyq sý úshin bereshek - 981 mln teńge

Qysty turaqty ótkizý úshin 7 341 tonna mazýt pen 407 tonna dızel otyny rezervke qoıyldy. Kásiporyn arnaıy tehnıka parkin tolyqtyryp, qazandyqtar men jelilerge jańa jabdyq satyp aldy.

Al qaryz máselesine kelsek, jylý jáne ystyq sý úshin bereshek 981 mln teńgeni quraıdy. Bul ótken jylmen salystyrǵanda 21%-ǵa az. Onyń basym bóligi – turǵyndardyń qaryzy (623 mln teńge) jáne birqatar iri kásiporyndardyń bereshegi. Bıyldyń ózinde 6 myńnan astam habarlama jiberilgen.

Qazirgi tańda nysandardyń tek 31%-y ǵana qysqa daıyndyq aktisin alǵan. Aldyńǵy qatarda – mektepter men medıtsına mekemeleri. Degenmen, turǵyn úıler men jeke kásipkerlerge qatysty jumys qarqyndatýdy qajet etedi.

Eske salaıyq, Premer-Mınıstr Oljas Bektenov óńirlerdiń jylytý maýsymyna daıyndyǵy boıynsha ákimderdiń jumysyn synǵa alǵan bolatyn.