Qostanaı oblysy mektebindegi týberkýlez: tekserý qorytyndysy shyqty
QOSTANAI. KAZINFORM – 2026 jyldyń naýryz aıynda Qostanaı oblysy Meńdiqara aýdanyndaǵy Ǵabbas Jumabaev atyndaǵy mektep-gımnazııada týberkýlez deregi tirkeldi. Epıdemııaǵa qarsy sharalar júrgizilgennen keıin jańa juqtyrý jaǵdaılary anyqtalǵan joq, dep habarlaıdy Kazinform agenttiginiń tilshisi.
Qostanaı oblystyq sanıtarııalyq-epıdemıologııalyq baqylaý departamentiniń resmı saýalǵa bergen jaýabyna sáıkes, aýrý faktisi boıynsha epıdemıologııalyq tekserý júrgizilgen. Mektepte baılanysta bolǵan adamdar sheńberi anyqtalyp, qorytyndy dezınfektsııa jasalǵan.
Jalpy sany 441 adam tekserýden ótti, onyń 339-y – oqýshylar. Barlyq baılanysta bolǵan tulǵalar Mantý synamasy, rentgenografııa jáne flıýorografııany qosa alǵanda, qajetti dıagnostıkalyq zertteýlerden ótken.
Vedomstvo málimetine súıensek, baılanysta bolǵandardyń arasynda aýrý juqtyrý jaǵdaılary tirkelmegen.
– Infektsııa kózi bolǵan ashana qyzmetkeri aýrýhanaǵa jatqyzylyp, em qabyldap jatyr. Departamentte naýqasty der kezinde oqshaýlaý jáne sanıtarııalyq talaptardy saqtaý uıymdasqan ujymdarda ınfektsııanyń taralý qaýpin tómen deńgeıde ustaıdy, – delingen departamenttiń resmı habarlamasynda.
Sonymen qatar tekserý barysynda qyzmetkerdiń mindetti medıtsınalyq tekserýsiz jumysqa jiberilgeni anyqtalǵan. Osyǵan baılanysty jeke kásipkerge qatysty ákimshilik sharalar qabyldandy.
Mamandardyń aıtýynsha, óńirde baılanysta bolǵan adamdarǵa medıtsınalyq baqylaý jalǵasyp jatyr.
Jalpy 2026 jyldyń basynan beri Qostanaı oblysynda týberkýlezdiń 66 jaǵdaıy tirkelgen. Onyń ishinde 14 jasqa deıingi balalar arasynda – 3, jasóspirimder arasynda – 2 jaǵdaı bar. 2025 jyldyń osy kezeńimen salystyrǵanda syrqattanýshylyq bir jaǵdaıǵa azaıǵan.
Bıylǵy alǵashqy úsh aıda jalpy bilim beretin mektepterde týberkýlezdiń 6 jaǵdaıy anyqtalǵan: 2-eýi qyzmetkerler arasynda, 4-eýi oqýshylar arasynda. 2025 jyly mektepterde 17 jaǵdaı, al bir balabaqshada 1 jaǵdaı tirkelgen. Aýrý juqtyrǵandardyń jartysy – tehnıkalyq qyzmetkerler.
Departament basshylyǵy árbir jaǵdaı boıynsha ınfektsııanyń taralýyna jol bermeý úshin epıdemııaǵa qarsy jáne profılaktıkalyq sharalardyń tolyq kesheni júrgiziletinin málimdedi.
Týberkýlezdiń aldyn alýdyń negizgi joldary retinde aýrýdy erte anyqtaý, táýekel tobyndaǵy balalarǵa jyl saıyn týberkýlındik dıagnostıka júrgizý jáne eresek turǵyndardy flıýorografııalyq tekserýden ótkizý kórsetildi.
Aıta keteıik, naýryz aıynda Qostanaıdaǵy mektepten týberkýlez shyqty degen habarlamadan keıin tergeý bastalǵanyn jazdyq.
