Qostanaı oblysy kásiporyndarynyń gazǵa qaryzy 1,3 mlrd teńgeden asqan
QOSTANAI. KAZINFORM - Qostanaı oblysyndaǵy jylý energetıkasy kásiporyndarynyń jetkizilgen taýarlyq gaz úshin jalpy bereshegi 1 mlrd 346,2 mln teńgege jetti.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Azamat Sabyrjannyń túsindirýinshe, birqatar kásiporyn úshin bereshekti óteý kestesi bekitilgen. Onyń oryndalýy jylytý maýsymyna daıyndyq jónindegi shtabtyń baqylaýynda.
2026 jyly Qostanaı oblysyn jylytý maýsymyna daıyndaýǵa jalpy 19,1 mlrd teńge bólindi. Usynylǵan málimetterge sáıkes, 118 jylý kózi, onyń ishinde tórt jylý elektr ortalyǵy (JEO) men 114 qazandyq jumysqa tolyq daıyndalǵan.
Sondaı-aq 3 015 kóppáterli turǵyn úı men 1 441 áleýmettik nysandy daıyndaý jumystary tolyq aıaqtaldy. Olardyń qatarynda 586 bilim berý mekemesi, 389 densaýlyq saqtaý nysany jáne 466 áleýmettik nysan bar. Budan bólek, jylý jelileriniń 30,7 shaqyrymy jóndeldi. Bul jumysqa shamamen 10,3 mlrd teńge qarastyrylǵan.
Qazandyq jabdyqtary men jylý kózderin jóndeýge 4,7 mlrd teńge bólindi. Onyń 1,5 mlrd teńgesi bıýdjet qarajaty bolsa, 3,2 mlrd teńgesi kásiporyndardyń óz qarajaty. Al elektr jelilerin jóndeý jumystarynyń 92%-y oryndaldy: josparlanǵan 739 shaqyrymnyń 681 shaqyrymy jańartyldy.
Osyǵan deıin elimizde 22 myńnan astam kásiporyn men uıymnyń energııa tutynýy baqylanatyny týraly jazdyq.
