Qostanaı oblysy ákiminiń orynbasarynyń ustalǵany rastaldy

ASTANA. KAZINFORM – Ulttyq qaýipsizdik komıteti Qostanaı oblysy ákiminiń orynbasaryna qatysty aqparatty rastady.

UQK baspasóz qyzmetiniń málimetinshe, Qostanaı oblysy ákiminiń orynbasary Gúlbaram Musaǵazınaǵa qatysty sotqa deıingi tergep-tekserý júrgizilip jatyr.

Buǵan deıin bul aqparat birqatar buqaralyq aqparat quraldarynda jarııalanǵan bolatyn. Keı derekterde onyń qamaýǵa alynǵany aıtylǵan. Ashyq derekkózderde oblys ákimi orynbasarynyń aty óńirdegi densaýlyq saqtaý salasyndaǵy rezonansty qylmystyq ispen baılanystyrylǵan.

Atap aıtqanda, Qostanaı oblystyq densaýlyq saqtaý basqarmasynyń burynǵy basshysy Danııar Jandaev, onyń orynbasary Erbolat Dospanov jáne Qarasý aýdandyq aýrýhanasynyń bas dárigeri Vladımır Golýbevke qatysty qamaý sharasy qoldanylǵany habarlanǵan edi.

Olarǵa medıtsınalyq uıymdar úshin jabdyqtardy memlekettik satyp alý barysynda sybaılas jemqorlyq áreketterine qatysy bar degen kúdikpen sotqa deıingi tergep-tekserý júrgizilip jatyr.

Sonymen qatar Sot kabıneti portalynda istiń Qostanaı qalasynyń tergeý sotyna túskeni týraly aqparat paıda bolǵan.

Eske salaıyq, buǵan deıin Qostanaı oblysynyń prokýratýrasy óńirdiń densaýlyq saqtaý salasyndaǵy bıýdjet qarajatyn jymqyrý kólemi 2 mlrd teńgeden asqanyn málimdegen. Tergeý nusqasyna sáıkes, medıtsınalyq uıymdar qajet etilmeıtin jabdyqtardy negizsiz joǵary baǵamen satyp alǵan.