Qostanaı oblysy ákiminiń eks-orynbasaryna qatysty istiń mán-jaıy belgili boldy
QOSTANAI. KAZINFORM – Qostanaı oblysy ákiminiń burynǵy orynbasary Gúlbaram Musaǵazınaǵa qatysty qylmystyq is boıynsha jańa málimetter jarııa boldy.
Oblystyq prokýratýranyń málimetinshe, atalǵan isti Qostanaı oblysy boıynsha Ulttyq qaýipsizdik komıtetiniń departamenti tergep jatyr.
– Musaǵazınaǵa qatysty sottyń sanktsııasymen bultartpaý sharasy retinde úıqamaq tańdaldy, – dep málimdedi qadaǵalaý organy.
Prokýratýra ókilderi QR Qylmystyq-protsestik kodeksiniń 201-babyna sáıkes ózge aqparat jarııa etýge jatpaıtynyn atap ótti.
Buǵan deıin QR Ulttyq qaýipsizdik komıteti baspasóz qyzmeti atalǵan is boıynsha tergeý júrip jatqanyn rastaǵan bolatyn. Sondaı-aq, birqatar buqaralyq aqparat quraldarynda eks-sheneýniktiń ustalǵany týraly aqparat taraǵan edi.
Gúlbaram Musaǵazınanyń esimi óńirdegi densaýlyq saqtaý salasyndaǵy rezonansty sybaılas jemqorlyq isimen baılanysty atalyp keledi.
Atalǵan is aıasynda Qostanaı oblystyq densaýlyq saqtaý basqarmasynyń burynǵy basshysy Danııar Jandaev, onyń orynbasary Erbolat Dospanov jáne Qarasý aýdandyq aýrýhanasynyń bas dárigeri Vladımır Golýbev qamaýǵa alynǵan.
Tergeý nusqasyna sáıkes, jemqorlyq shema medıtsınalyq jabdyqtardy memlekettik satyp alý kezinde júzege asqan. Atap aıtqanda, medıtsınalyq uıymdar qajetsiz jabdyqtardy joǵary baǵamen satyp alǵan.
Prokýratýra dereginshe, óńirdiń densaýlyq saqtaý salasyndaǵy keltirilgen shyǵyn kólemi 2 mlrd teńgeden asqan.
Aıta keteıik, Qostanaıda 3 mlrd teńge sýbsıdııa jymqyrý isi boıynsha úkim shyqty.
