Qostanaı men Tarazdy salystyrmańyzdar - ákim
QOSTANAI. QazAqparat - Arhımed Muhambetovtiń turǵyndarmen kezdesýinde jolaqy qunynyń ósýi sóz boldy, dep habarlaıdy QazAqparat.
Oblystyq jolaýshylar tasymaldaý qaýymdastyǵynyń tóraǵasy, «TTS Reisen» JShS dırektory Alekseı Boıchenkonyń aıtýynsha, qaladaǵy qoǵamdyq kólikter tarıfin kóterý máselesi biraz ýaqyttan beri qozǵalyp keledi.
«Byltyrǵy qarasha aıynda jol tasymaldaýshylar tarıfti ósirý týraly ákimdikke usynys jazdy. Endi osy máseleni sheship berýińizdi suraımyz», - dedi Boıchenko oblys ákimine.
Qostanaı qalasynyń ákimi Bazyl Jaqypovtyń aıtqandaı, bul suraq áli qalalyq qoǵamdyq keńestiń talqylaýynda. Óz kezeginde Arhımed Muhambetov birneshe tapsyrma júktedi.
«Tarıfti ósirý otbasylyq bıýdjetke aıtarlyqtaı áser etedi. Sol sebepti, áýeli qoǵamdyq tyńdaý ótkizińizder. Ekinshiden, basqa da aımaqtardyń kórsetkishterin esepke alý qajet. Máselen, bizdi Tarazben salystyrmańyzdar. Ol jaqta qys aıynda shyǵyn az bolady. Al Qostanaılyq jol tasymaldaýshylar dızeldik otyndy kóp tutynady. Osyny eskerińizder. Bul rette halyqqa durystap túsindirińizder. Petropavl, Kókshetaý jáne Pavlodarda jolaqy qandaı? Eger Qostanaıda elimiz boıynsha eń tómen jolaqy quny engizilse, onda baǵany arttyrýǵa bolady», - dedi oblys ákimi.
