Qostanaı men Soltústik Qazaqstandy jalǵaıtyn 43 shaqyrym jol jańartyldy
ASTANA. KAZINFORM — Qostanaı oblysynda 43 shaqyrym respýblıkalyq mańyzy bar avtojol ortasha jóndeýden ótti, dep habarlaıdy «QazAvtoJol» UK baspasóz qyzmeti.
Qostanaı oblysynda respýblıkalyq mańyzy bar KAZ18 «Qostanaı — Mamlıýtka» avtomobıl jolynyń jalpy uzyndyǵy 43 shaqyrymdy quraıtyn eki ýchaskesinde ortasha jóndeý jumystary aıaqtalyp, jol paıdalanýǵa berildi.
Atalǵan avtojol Qostanaı jáne Soltústik Qazaqstan oblystary arasyndaǵy kólik qatynasyn qamtamasyz etip, jolaýshylar men júk tasymalynda mańyzdy ról atqarady.
— Jóndeý jumystary Uzynkól kentinen Ershovka aýylyna deıingi 250–267-shaqyrymdar aralyǵyndaǵy 17 shaqyrymdy jáne Nechaevka kentinen Tobyl qalasyna deıingi 380–406-shaqyrymdar aralyǵyndaǵy 26 shaqyrymdy qamtydy. Jumys barysynda eski asfaltbeton jabyny jonylyp, jol negizi jańa materıaldar qosý arqyly sýyq joný (resaıklıng) ádisimen óńdeldi. Odan keıin asfaltbeton jabynynyń tómengi jáne joǵarǵy qabattary tóseldi. Sonymen qatar jol jıekteri nyǵaıtylyp, jol tańbalary syzyldy jáne jańa jol belgileri ornatyldy, — delingen habarlamada.
Jóndeý jumystaryna saǵatyna 120 tonna ónim óndiretin asfaltbeton zaýyty tartyldy. Jobaǵa 31 jol-qurylys tehnıkasy men 36 maman jumyldyryldy.
Nátıjesinde 43 shaqyrym jol jabyny jańartylyp, jol qozǵalysynyń qaýipsizdigin arttyrýǵa jáne júrgizýshilerge qolaıly jaǵdaı jasaýǵa múmkindik týdy.
Budan buryn Almaty oblysynda júk kólikteri endi aınalma jolmen júrmeıtinin jazǵanbyz.
