Qostanaı men Mınsk áriptestik baılanysyn nyǵaıtpaq
Kúnniń birinshi jartysynda Qostanaı oblysynyń delegatsııasy «Joǵary tehnologııalar parki» memlekettik mekemesindegi jıynǵa qatysty. Basqosýda mekeme basshysy Aleksandr Martınkevıch pen mekemeniń halyqaralyq baılanys jónindegi ofısiniń dırektory Kırıll Zalesskıı boldy. «Joǵary tehnologııalar parki» kompanııalary men rezıdentteri jasap shyǵarǵan mobıldik qosymshalar álemniń 193 elinde paıdalanylady. Atap aıtqanda, álemge tanymal World of Tanks oıyny men Viber qosymshasy arqyly atalǵan mekeme eksporttan edáýir paıda taýyp otyr. Jalpy, parktiń 1 mıllıardtan astam tutynýshysy bar. Mundaǵy qosymshalar men tsıfrly baǵdarlamalardyń 91%-dan astamy eksportqa shyǵady.
Jıyn barysynda «Tsıfrlyq Qazaqstan» baǵdarlamasynyń Qostanaı oblysynda júzege asyp jatqan basym baǵyttary talqylandy. Onyń ishinde, belarýstik áriptesterge SmartCity tehnologııasy, bilim, aýyl sharýashylyǵy jáne densaýlyq saqtaý salalaryn tsıfrlandyrý jobalary tanystyryldy.
Oblys ákiminiń orynbasary Mınsk qalalyq atqarý komıteti tóraǵasynyń orynbasary Aleksandr Krekovpen kezdesip, aýyl sharýashylyǵy,týrızm jáne bilim salalary boıynsha pikir almasty. Qos tarap birigip ınvestıtsııalyq jobalardy qolǵa alýdy josparlady. Aldaǵy ýaqytta Qostanaı oblysynyń terrıtorııasynda MTZ markaly traktor qurastyrylýy múmkin. Sondaı-aq, belarýstik agrarshylar Qostanaıdan astyq tasymaldaýǵa qyzyǵýshylyq tanytty.
Basqosý sońynda eki tarap tsıfrlandyrý baǵyty boıynsha áriptestikke ýaǵdalasty. Kezdesý barysynda talqylanǵan máseleler Qostanaı oblysy men Mınsk qalasynyń «Jol kartasyna» enetin bolady. Ekijaqty kelisimge sáıkes, Belarýs eliniń delegatsııasy jumys babymen Qostanaı oblysyna kelmek.
