Qostanaı men Qyzylorda áýejaılaryna avıaotynnyń baǵasyn negizsiz kótergeni úshin aıyppul salyndy
ASTANA. KAZINFORM — Básekelestikti qorǵaý jáne damytý agenttigi óńirlerdegi áýejaı qyzmetteri naryǵy sýbektilerine qatysty avıaotyn satý kezinde monopolııalyq joǵary baǵalardy belgileý jáne ustap turý faktileri boıynsha monopolııaǵa qarsy sharalar jumysyn júrgizdi.
Agenttiktiń Qostanaı oblysy boıynsha departamenti «Ahmet Baıtursynuly atyndaǵy «Qostanaı» halyqaralyq áýejaıyna qatysty Kásipkerlik kodeksiniń 174-baby 1) tarmaqshasynda kózdelgen basym jaǵdaıdy teris paıdalaný belgileri boıynsha tergep-tekserýdi aıaqtady.
— Tergep-tekserý qorytyndysy boıynsha aktsıonerlik qoǵamǵa qatysty Ákimshilik quqyq buzý týraly kodeksiniń 159-babynyń 3-bóligi boıynsha ákimshilik is qozǵaldy. Mamandandyrylǵan ákimshilik quqyq buzý jónindegi sottyń sheshimimen naryq sýbektisi ákimshilik jaýapkershilikke tartyldy. Aıyppul men monopolııalyq kiristi tárkileýdiń jalpy somasy 16,6 mln teńge boldy. Sot qaýlysy zańdy kúshine endi, — delingen Básekelestikti qorǵaý jáne damytý agenttigi taratqan habarlamada.
Sonymen qatar, qoǵamnyń atyna monopolııaǵa qarsy zańnamany buzýdy toqtatý týraly nusqama engizildi.
— Uqsas sharalar agenttiktiń Qyzylorda oblysy boıynsha departamenti tarapynan «Qorqyt Ata» áýejaıynyń qyzmetinde anyqtalǵan zań buzý boıynsha qabyldandy. Tergep-tekserý barysynda avıaotyn qunynyń negizsiz kóterilgeni anyqtalyp, bul Kásipkerlik kodeksiniń 174-babynyń 1) tarmaqshasyn buzý retinde saralandy.
Tergep-tekserý nátıjeleri boıynsha qoǵamǵa 7,3 mln teńge mólsherinde aıyppul salynyp, 2,5 mln teńge kóleminde monopolııalyq kiris tárkilendi, — delingen habarlamada.
Sondaı-aq zań buzýdy joıý týraly nusqama berilip, ony oryndaý sheńberinde avıaotynnyń satý baǵasy 780 000 teńgeden 533 750 teńgege deıin (QQS-syz) tómendetildi.
Aıta ketelik Óskemen áýejaıy avıaotynǵa monopolııalyq joǵary baǵa qoıǵany úshin aıyppul arqalaǵan edi.