Qostanaı men Aqtóbe shekarasynda jabylǵan jolda 250 júk kóligi jınalyp qaldy
QOSTANAI. KAZINFORM — Qostanaı oblysyndaǵy respýblıkalyq mańyzy bar A-22 kúre jolynda aýyr júk kólikterinen keptelis paıda boldy. QazAvtoJol ulttyq kompanııasy jaǵdaıdy túsindirdi.
7 aqpanda Aqtóbe oblysyndaǵy boranǵa jáne atalmysh oblysta joldyń jabylýyna baılanysty respýblıkalyq mańyzy bar A-22 «Qarabutaq-Komsomolskoe-Denısovka-Rýdnyı-Qostanaı» avtojolynyń 234-386 shaqyrymynda (Aqtóbe oblysynyń shekarasynan Denısovka kentine deıingi aralyqta) kóliktiń barlyq túrin ótkizbeý jóninde sheshim qabyldanǵan.
Alaıda, jol qozǵalysy shektelgen ýchaskelerde Denısovka kenti, Lısakovsk aýyly jáne Tobyl stansasy mańynda 200-250 tranzıttik aýyr kólik jınalyp qalǵan.
«Qostanaı oblysynda arnaıy tehnıka shtattyq rejımde istep jatyr. Oblys aýmaǵynan ótetin atalmysh kúre jolda qozǵalys qamtamasyz etilgen, biraq tranzıttik kólikterge shekteý tek Aqtóbe oblysyndaǵy aýa raıy turaqtalǵannan keıin ǵana alynady. Sonymen qatar, Aqtóbe oblysyna deıingi avtojol boıynda júrgizýshiler men jolaýshylarǵa qyzmet kórsetetin servıs sany (janarmaı quıý stansalary, kempıngter, tamaqtaný oryndary, qonaq úıler) jetkiliksiz» dep habarlady kompanııadan.
Osy faktorlardy negizge ala otyryp, jol qozǵalysyna qatysýshylardyń qaýipsizdigin qamtamasyz etý maqsatynda respýblıkalyq mańyzy bar A-22 avtojolynyń Aqtóbe oblysy shekarasynan Denısovka aýylyna deıingi aralyqta jol qozǵalysyna ýaqytsha shekteý engiziledi.
