Qostanaı memlekettik pedagogıkalyq ınstıtýty ýnıversıtet mártebesin aldy
QOSTANAI. QazAqparat - Qostanaı memlekettik pedagogıkalyq ınstıtýty ýnıversıtet mártebesine ıe boldy. Bul týraly óńirlik kommýnıkatsııalar qyzmetinde ótken jıynda oqý ornynyń rektory Erkin Ábil málim etti, dep habarlaıdy QazAqparat.
«Sońǵy 5-6 jylda QR Bilim jáne ǵylym mınıstrligi joǵary bilim alýǵa qoljetimdilik deńgeıin arttyrýǵa baılanysty biraz talap qoıdy. Sonyń biri magıstratýra men doktorantýraǵa jol ashý ekeni belgili. Bizdiń ınstıtýt jańa mártebe alý úshin kóp jumys istedi. Mınıstrliktiń tekserisinen ótip, 2018 jyldyń 6 naýryzynan bastap ýnıversıtet mártebesine ıe boldyq», - dedi Erkin Ábil.
Rektordyń aıtýynsha, oqý ornynda bıyldan bastap jataqhana salý, bilim granttaryn kóbeıtý jumystary qolǵa alynady.
«Ýnıversıtet mártebesi oqytýshylar úshin de, stýdentterge de jańa múmkindikter ashady. Eger ınstıtýt bir profıldiń stýdentterin daıarlasa, ýnıversıtet túrli baǵyttaǵy mamandardy oqytady. Budan basqa, endi bizdiń stýdentterimiz magıstratýrada jáne doktorantýrada oqýlaryn jalǵastyra alady. Eldiń basqa óńirlerine nemese Reseıge shyǵýdyń qajeti joq. Aldaǵy ýaqytta halyqaralyq reıtıngterden kórinýge tyrysymaz», - deıdi rektor.
Belgili bolǵandaı, Qostanaı memlekettik pedagogıkalyq ýnıversıteti kelesi oqý jylynan bastap «Pedagogıka jáne psıhologııa» mamandyǵyna magıstratýra talapkerlerin qabyldaıdy. Al doktorantýra «Tarıh» jáne «Bıologııa» mamandyǵy boıynsha ashylmaq.
Foto: baq.kz
