Qostanaı mektepterine 6 myńǵa jýyq kompıýter satyp alyndy
QOSTANAI. QazAqparat – Qostanaı oblysynda mektepterdi kompıýterler jáne ınternetpen qamtamasyz etý úshin qomaqty qarjy bólinedi, dep habarlaıdy QazAqparat oblystyq bilim basqarmasynyń basshysy Vasılıı Tsymbalıýkke silteme jasap.
Óńirde bilim salasyn qarjylandyrý kólemi eki esege artqan. Sonyń nátıjesinde mektep ınfraqurylymyn damytýǵa mol múmkindik týyp otyr. Máselen, bıyl jańadan 3 mektep boı kóteredi. 130- ǵa jýyq bilim berý ǵımarattaryna jóndeý júrgizý josparlanǵan. Basty kórsetkish – bilim salasyn tsıfrlandyrý jumystary jaqsardy.
«Oblys mektepterine 6 myńǵa jýyq jańa kompıýter satyp alyndy. Oǵan shamamen 1,4 mıllıard teńge bólindi. Mektepterdiń 80 paıyzy kompıýterlermen jaraqtandyryldy. Karantın rejımi engizilgeli qashyqtan oqýǵa kóshtik. Bul tsıfrlyq bilim berýdiń qajettiligin kórsetti. Bilim nysandaryn keń jolaqty ınternetpen qamtamasyz etý maqsatynda bıýdjetten 153 mln teńge qarastyryldy. Jalpy, sońǵy úsh jylda metsenattardyń kómegimen óńirde 66 IT-synyp pen 31 robototehnıka kabıneti ashyldy», - dedi Vasılıı Tsymbalıýk.
Basqarma basshysy aıtqandaı, oqýshylardyń jazǵy demalysy qatań baqylaýǵa alynady. Sanıtarlyq- epıdemıologııalyq talaptar demalys lagerlerinde saqtalady. Bıyl oblys aýmaǵynda úsh lager jumys isteıdi. Olar: General Bákirov atyndaǵy demalys bazasy, «Lesnaıa skazka» jáne «Altyngúl» saýyqtyrý lagerleri. Demalys aımaqtaryna ata-anasynyń qamqorynsyz qalǵan 400-deı jetkinshekke joldama beriledi.
