Qostanaı mekemelerinde 500-ge jýyq jemqorlyq táýekelderi anyqtaldy
Sybaılas jemqorlyq táýekelderine syrtqy taldaý júrgizý Qazaqstan Respýblıkasynyń «Sybaılas jemqorlyqqa qarsy is-qımyl týraly» Zańynda aldyn alý mehanızmderiniń biri bolyp bekitilgen.
«2018 jyly osyndaı 41 syrtqy taldaý júrgizilip, 487 táýekel anyqtaldy. Olardy joıý boıynsha memlekettik organdar men uıymdar atyna 157 usynys engizildi. Bıyl biz atalǵan aldyn alý jumystaryn jalǵastyrýdamyz. Taldaýmen 7 oblystyq, qalalyq jáne aýdandyq deńgeıdegi memlekettik organ qamtyldy. Memlekettik qyzmet kórsetý men azamattardyń shaǵymdaryn qaraý kezinde, kadrlyq saıasatta jáne etıkalyq normalardy saqtaýda sybaılas jemqorlyq táýekelderi anyqtaldy», - deıdi Rústem Bolat.
Jalpy taldaý eki baǵytta júrgizilgen. Olar - normatıvtik quqyqtyq aktilerdegi dıskretsııalyq normalardy anyqtaý jáne basqarýshy qyzmettegi sybaılas jemqorlyq faktorlary.
«Negizi, áleýmettik qorǵaý salasynda 34 memlekettik qyzmet kórsetiledi. Kóbine, jemqorlyq táýekelderi tikeleı baılanys sanatyna jatatyn qyzmetterde bilinip jatady. Buǵan qujat berý jáne qabyldaýdy mysalǵa alýǵa bolady. Budan ózge, medıtsınalyq-áleýmettik saraptama júrgizý kezinde de táýekelder belgisi baıqalady. Sol sebepti sarapshylardyń jumys oryndarynda beınekameralar ornatyldy. Qazirgi tańda tsıfrlandyrýdy engizý ádisi arqyly sybaılas jemqorlyqtyń aldyn alý múmkindikteri qarastyrylýda. Bul maqsatta pılottyq joba ázirlenip jatyr», - deıdi basqarma basshysy.
Rústem Bolat aıtqandaı, búginde sybaılas jemqorlyqtyń aldyn alý maqsatynda «Qostanaı - adaldyq alańy» atty jobalyq keńse sheńberinde birqatar sharalar qabyldanýda. Negizgi maqsat - qoǵamdaǵy turmystyq sybaılas jemqorlyqty túbegeıli joıý.