Qostanaı: Máslıhatqa depýtattardyń basym bóligi «Nur Otannan» saılandy
QOSTANAI. QazAqparat - Osy demalysta Qostanaı oblysynda oblystyq jáne aýdandyq máslıhat depýtattarynyń saılaýy bolyp ótti. Bul týraly «QazAqparat» HAA tilshisi habarlady.
Depýtattar shyǵyp qalǵan mandat ıeleriniń ornyna saılandy. Daýys berý Lısakovsk, Meńdiqara, Altynsarın jáne Fedorov aýdandarynda ótti.
Qostanaı oblystyq saılaý komıssııasynyń tóraıymy Antonına Markovanyń aıtýynsha, 7 depýtattyq mandatqa 23 úmitker usynyldy. Onyń bireýi qajetti qujattarynyń bolmaýy saldarynan tirkelgen joq. Saılaý balamaly túrde ótti: «Nur Otan» partııasynyń úmitkerlerinen basqa eki partııanyń - QKHP jáne «Aq jol» partııasynyń ókilderi qatysty.
Qorytyndysynda oblystyq máslıhattyń depýtaty retinde «Nur Otan» partııasynyń músheleri - Qostanaı memlekettik pedagogıkalyq ınstıtýtynyń rektory Erkin Ábil men «Qazaqstan Alıýmınııi» AQ bólimshesi dırektorynyń mindetin atqarýshy Sergeı Şelokov saılandy.
Aýdandyq máslıhatqa saılanǵan bes halyq qalaýlysynyń biri «Aq Jol» partııasynan Meńsulý Bolatova bolsa, qalǵandary - «nurotandyqtar».
