Qostanaı qutqarýshylary úıindi astynda bir adam ólgeni týraly qate aqparat taratqan

Qostanaı oblysy tótenshe jaǵdaılar departamenti qate aqparat taratqanyn moıyndady. Búgin tańerteń Qostanaıdaǵy gaz jarylysynan keıin úıindi astynan beımálim er adamnyń denesi tabylǵany habarlanǵan edi. TJD basshylyǵy qate ketkenin moıyndady, dep habarlaıdy Kazinform. 

Buǵan deıin Qostanaıda 7 adam qıraǵan úıdiń astynda qalyp qoıǵany habarlanǵan edi.

Keıin úsh adam úıindi astynan shyǵaryldy. TJD sonyń bireýi kóz jumǵanyn málimdegen. 

«Er adamnyń óli denesi tabyldy degen aqparat qate berildi. Qutqarylǵan er adam medıtsınalyq mekemege jatqyzyldy. Oqıǵa ornynan barlyǵy 11 adam aýrýhanaǵa jetkizildi», — dep habarlaıdy TJD baspasóz qyzmeti.  

Qatty aıazdyń jáne konstrýktsııa qırandylarynyń kóp bolýy izdeý-qutqarý jumystaryn qıyndatyp otyr. 

Jumys jalǵasyp jatyr. 

Aqparat shetinen tolyqtyrylady.