Creative Aimaq: Qostanaı kreatorlary 4,5 mln teńgeniń ónimin satty
ASTANA. KAZINFORM — Jármeńkede Qostanaı oblysynyń tarıhı-mádenı murasy, ulttyq qolóner buıymdary, jergilikti avtorlyq brendter jáne kreatıvti ındýstrııa ónimderi kópshilik nazaryna usynyldy, dep habarlaıdy Mádenıet jáne aqparat mınıstrligi.
Astanada Qazaq Creative Hub alańynda Kreatıvti ındýstrııalardy damytý qory júzege asyryp jatqan Creative Aimaq respýblıkalyq jobasy aıasynda Qostanaı oblysynyń kreatıvti jármeńkesi aıaqtaldy.
Іs-shara barysynda «Altyn dombyra» syılyǵynyń ıegeri, aıtys aqyny Aıbek Qalıevpen kezdesý ótti. Aıtyskerdiń jeke dombyrasy, ulttyq mýzykalyq aspaptar jáne Qostanaı óńirinen shyqqan kórnekti tarıhı tulǵalarǵa arnalǵan ekspozıtsııa tanystyryldy.
Baǵdarlama aıasynda qostanaılyq dızaınerlerdiń etnotoptamalary kórsetilip, Nıý-Iorktegi MobFilm Festival halyqaralyq kınofestıvaliniń fınalısi atanǵan «Qalam» mobıldi fılmi tanystyryldy. Kelýshiler óńir jastarynyń zamanaýı tehnıkalyq jobalarymen jáne Qazaqstandaǵy alǵashqy stýdenttik bolıdpen tanysty.
Jármeńkede elimizdegi alǵashqy folklorlyq-etnografııalyq ujymdardyń biri «Sherter» ansambli óner kórsetti. Ujymnyń oryndaýyndaǵy halyq kúıleri men ánderi ulttyq ónerdiń aıryqsha bolmysyn tanytty.
Aıta keteıik, is-sharaǵa 1320 adam qatysty. Jármeńke barysynda kreatorlardyń avtorlyq ónimderi 4 mıllıon 414 myń teńgege satyldy.
Buǵan deıin Astanadaǵy «BaiQymyz» baıqaýynyń jeńimpazdary belgili boldy.
