Qostanaı kósheleri resaıklıng ádisimen jóndeledi
QOSTANAI. QazAqparat - Bıyl Qostanaıda jol jóndeýge 6 mlrd teńge qarajat bólindi. Bul qarjyǵa 39 kóshe jóndeledi, dep habarlaıdy QazAqparat qala ákimi Bazyl Jaqypovqa silteme jasap.
Bólingen qarajatqa tek ortalyq kósheler ǵana emes, jeke sektorlardaǵy joldar qalypqa keltiriledi. Byltyr 5,5 mlrd teńge bólinip, Qostanaıdaǵy 48 kóshe jóndeýden ótken edi. Turǵyndarǵa esep berý kezinde qala ákimi Bazyl Jaqypov málim etkendeı, Maılın kóshesindegi jumystar tolyǵymen aıaqtaldy. Al Lermontov, Naberejnyı jáne Karbyshev kóshelerin qalypqa keltirý osy jyly jalǵasady.
«Negizgi degen 10 kóshe qalypqa keltiriledi. Oǵan 4,2 mlrd teńge jumsalady. Atap aıtqanda, byltyr aıaqsyz qalǵan Naberejnaıa, Lermontov, Táýelsizdik kósheleri, Pavlov kóshesiniń biraz aýmaǵy, Abaı dańǵyly, Sıanov kóshesindegi ótpejol, Gagarın kóshesi de jańarady. Taǵy 5 kóshe ortasha jóndeýden ótedi. Olarǵa 750 mln teńge qarastyrylǵan», - dedi qala basshysy.
Aıta ketý kerek, kósheler resaıklıng ádisimen jóndeledi. Osylaısha, eski asfaltti kádege jaratýǵa múmkindik bar. Sýyq resaıklıng tehnologııasy arqyly eski tósemdi qyzdyrý qajet emes. Bul qýatty únemdeý jaǵynan da, qorshaǵan ortany qorǵaý jaǵynan da mańyzdy. Sondaı-aq, atalǵan ádis asfalt-beton qyzmetin ortasha alǵanda 3-5 jylǵa uzartady.
Munyń syrtynda, oblys ortalyǵynda 102 myń sharshy metrlik jol tósemi jónge keltiriledi. Qala ákimi aýlalar ishin nazardan tys qaldyrmaıtynyn aıtty. Buǵan 430 mln teńge qarastyrylyp otyr.
Bazyl Jaqypov atap ótkendeı, búginde kólik ınfraqurylymyna qatysty barlyq konkýrstar jarııalanǵan, ótinimder qabyldaý júrgizilip jatyr. Qolaıly aýa raıy týysymen-aq qalada jol jóndeý jumysy bastalady.
