Qostanaı kolonııasy Balalar úıine maska men aıaq kıim tigip berdi
QOSTANAI. QazAqparat – Qostanaı oblysynda kolonııada jazasyn óteýshiler Balalar úıiniń tárbıelenýshilerine maskalar men aıaq kıimder tigip berdi, dep habarlaıdy QazAqparat.
Qaýipsizdigi barynsha joǵary túzetý mekemesi bastyǵynyń orynbasary Erik Ramazanovtyń aıtýynsha, bul shara ata-anasynyń qamqorlyǵynsyz qalǵan balalardy qoldaý úshin jasalǵan. Rýdnyı qalasynyń korrektsııalyq mektep-ınternatynyń tárbıelenýshilerine 250-ge jýyq qorǵanys maskasy, sondaı-aq 20 jup aıaq kıim tigilgen.
«Jetim balalarǵa kómek kórsetý áleýmettik mańyzy bar jumysymyzǵa jatady. Sottalǵandar arasynda tárbıelik máni bar sharalardy kóbirek ótkizýge tyrysamyz. Bul, bir jaǵynan, olardyń ózderine de jaqsy. Qylmys kolonııasynyń maqsaty da sottalǵandardy túzeý, jaqsy jaqqa damytý sanalady. Jaqsylyqqa bastaıtyn osyndaı bastamalarymyz jeterlik», - dep atap ótti mekeme bastyǵynyń orynbasary.
Qylmystyq-atqarý júıesi qyzmetkerleri balalarǵa súlgi, keńse taýarlary, sondaı-aq dıdaktıkalyq materıaldar men ústel oıyndaryn syıǵa tartty.
Bul syılyqqa mektep-ınternatynyń balalary dán rıza. Olar únemi qoldap, kómek kórsetýdi ıgi dástúrge aınaldyrǵan qylmys kolonııasy qyzmetkerlerine alǵystaryn bildirdi.
