Qostanaı kásipkerlerine jyldyq 6 paıyzben nesıe beriledi
QOSTANAI. QazAqparat - Oblysta kelesi jyly 17 aýylsharýashylyq kooperatıvi qurylady. Ázirge birneshe pılottyq jobalar iske qosyldy, dep habarlaıdy QazAqparat tilshisi.
Jyl sońyna deıin birqatar aýyl sharýashylyǵy óndiristik kooperatıvteriniń qanatqaqty jobalary tanystyrylady. Eger olar jaqsy kórsetkishterge qol jetkizse, kelesi jyly memleketten qoldaý taba alady. Kásip bastaýshylarǵa «Bereke», «Igilik», «Yrys» baǵdarlamalary boıynsha jyldyq 6 paıyzbennesıe beriledi. Búginde sút baǵytynda Fedorov, Meńdiqara, Qostanaı aýdandarynda jáne et baǵytynda Amangeldi, Denısov jáne Sarykól aýdandarynda kooperatıvter jumys istep tur.
Máselen, Qostanaı aýdanyndaǵy «Aleksandrovka» ujymshary sút óndirisimen aınalysady.
«Kooperatıv quramyna 25 qosalqy sharýashylyq kiredi. Ónim ıgerý somasy 74 mln teńgege jetip otyr. Bul negizgi jospardaǵydan 15 mln teńgege artyq. Kooperatıv Qostanaı aýdanyndaǵy 4 aýylda ónim shyǵarady», - dedi Qostanaı aýdany aýyl sharýashylyǵy bóliminiń basshysy Marat Sartov.
Bólim basshysynyń aıtýynsha, «Aleksandrovka» kooperatıvi bir kúnde 300 lıtr sút óndiredi. Aýylda sútke degen suranys joǵary. Sol sebepti jyl aıaǵyna deıin súttiń bir lıtri 90 teńgeden satylady. 
