Qostanaı kásipkerleri «bir tereze» qaǵıdasyn engizýdi usyndy
Qarabalyq aýdanyndaǵy «Terra» JShS basshysy Dáýlet Ahmetqalıevtiń aıtýynsha, aýdan oblys ortalyǵynan qashyq ornalasqandyqtan taýar sertıfıkatyn alý qıynǵa soǵady.
«Terra» ónimderi Qostanaı oblysy men Astananyń saýda alańdaryn qamtyp, Reseıge eksporttalady. Seriktestik bazasynda 8000 iri qara maldy bordaqylaý alańy qurylǵan. Bizden shyǵatyn et ónimderi barlyq tehnologııalyq normaǵa saı. Alaıda, qazir bizge syrt elge taýar tasymaldaý úshin biraz ýaqyt ketedi. Sol aralyqta ettiń buzylyp ketý qaýpi de joq emes. Máselen, Keden odaǵyna múshe memleketterdiń et ónimderiniń naryǵyndaǵy erejeleri boıynsha negizgi taýarǵa ilespe qujattar kerek. Qarapaıym taýardyń shyǵý sertıfıkatyn alý úshin Qarabalyqtan Qostanaı qalasyna kelýge májbúrmiz. Eki eldi mekenniń araqashyqtyǵy 140 shaqyrym ekenin eskersek, bizge túsetin shyǵyn da sonshalyqty kóp», - deıdi D.Ahmetqalıev.
Dál osy máseleni «Prombaza 7» JShS dırektory Muhamedjan Akýlov ta qozǵady. Onyń sózinshe, «Atameken» kásipkerler palatasynan alynatyn taýar sertıfıkaty úshin eki ese shyǵyndalýǵa týra keledi.
«Biz ósimdik maıyn Qytaı men Reseıge eksporttaımyz. Men basqaratyn kásiporyn shekarada qujat rásimdeý kezinde biraz qıyndyqtarǵa tap bolady. Buǵan qosa «Atameken» UKP-nan ST-1 taýardyń shyǵý serıfıkatyn alý úshin birneshe qujat daıyndaýǵa týra keledi. Sondaı-aq, taýar tıelgen árbir vagon nemese tsısterna úshin 10 myń teńge tóleımiz. Bul áldeqaıda úlken shyǵyndarǵa ákep soǵady», - deıdi Akýlov.
Taýar sertıfıkatyn alýdaǵy qıyndyqtardy aıtqan kásipkerler «bir tereze» qaǵıdasyn engizýdi suraıdy.
«Taýardy eksportqa shyǵarý úshin beriletin sertıfıkatty bir jerden alǵan yńǵaıly. Ekinshiden, ár aýdanda «Atameken» UKP fılıaly bar. Taýardyń shyǵý sertıfıkatyn jergilikti óńirden alǵan jumysty jeńildetedi», - degen usynys aıtty kásipkerler.
Óz kezeginde Qostanaı oblysy ákiminiń orynbasary Meıirjan Myrzalıev eksportqa shyǵaratyn taýar kólemin kóbeıtý kerektigin aıtty. Al kásipkerlerdiń usynysy tıisti organǵa joldanady.
