Qostanaı qalasynyń tsıfrlyq kartasy tanystyryldy

QOSTANAI. QazAqparat – Búgin oblys ákimdiginde tsıfrlandyrý jobalaryn iske asyrý máseleleri jóninde keńes ótti, dep habarlaıdy QazAqparat oblys ákiminiń baspasóz qyzmetine silteme jasap.

Óńir basshysy Arhımed Muhambetov tóraǵalyq etken jıynda «Aqyldy qalalar» jobalary boıynsha atqarylǵan jumystar talqylandy. Qostanaı qalasynyń ákimi Qaırat Ahmetov oblys ortalyǵyndaǵy aýqymdy jobalarmen tanystyrdy. Onyń aıtýynsha, 2017 jyly qolǵa alynǵan «Smart City» tujyrymdamasy ár salada paıdalanyldy. Budan ári «Tsıfrlyq Qazaqstan» memlekettik baǵdarlamasynyń 5 basym salasy anyqtaldy. Sondyqtan Qostanaı qalasy da qaýipsizdik, TKSh, bilim berý, densaýlyq saqtaý, kólik salalaryna ekpin túsirdi.

«Qalanyń ınjenerlik ınfraqurylymynyń aǵymdaǵy jaı-kúıi týraly aqparat beretin «Tsıfrlyq taldamalyq karta» jasaldy. Jumys bıyl anyqtalady. Kartada Qostanaı qalasynyń kósheleri men joldary, kommýnaldyq jeliler jáne áleýmettik nysandar kórsetiledi. Turǵyndar aqaý shyqqan qubyrlar nemese energetıka máseleleri týraly habardar bolady. Tolyq málimet «SmartQostanai» qosymshasynda jarııalanǵan. Atalǵan jobanyń quny 50 mln teńge, qazir onyń 13 mln teńgesi tolyq ıgerildi», - deıdi Qostanaı ákimi.

Sondaı-aq, oblys ortalyǵyndaǵy qoǵamdyq kólikterge elektrondyq bılet engizý, kóshedegi jaryqshamdardy basqarýdy tsıfrlandyrý, kommýnaldyq jelilerdi avtomattandyrý, qalalyq beınebaqylaý júıesin damytý boıynsha jumystar júrgizilýde.

Keńes qorytyndysynda Arhımed Muhambetov «Smart City» tujyrymdamasyn iske asyrý jumystaryn sapaly júrgizýdi tapsyrdy.

«Joǵary ındıkatorlarǵa qol jetkizý boıynsha 110 tsıfrlyq bastama bekitilgen. Bilim berý, qurylys jáne densaýlyq saqtaý salalarynda oń kórsetkishterge qol jetkizildi. Mysaly, «Qazposhta» AQ oblystyq fılıalymen birlesip, qalada «áleýmettik ID karta» jobasyn iske qosý jumystary bastaldy», - dedi aımaq basshysy.