Qostanaı qalasynyń barlyq kóshesine asfalt tóseledi

QOSTANAI. QazAqparat - Qostanaı qalasynda 90 shaqyrymǵa jýyq jolǵa tas tóseledi, dep habarlaıdy QazAqparat qalalyq TKSh bóliminiń basshysy Alekseı Tarasovqa silteme jasap.

«Qazirgi ýaqytta joldardyń sapasyna qatysty turǵyndardan shaǵym kóptep kelýde. Kósheniń oıly-shuńqyrly bolýynan kólikter balshyqqa batyp, ábigerge túsedi.Turǵyndar osy problemany birneshe ret kóterdi. Endi aldaǵy 5 jylda qalanyń barlyq kóshesine asfalt tóseıtin bolamyz», - dedi A.Tarasov.

Qazir qala kósheleriniń 90 shaqyrym jolyna tas tóselmegen. Bul aýmaqty tasjolmen qamtamasyz etýge jyl saıyn 700 mln-1 mlrd teńge bólinedi. 5 jylǵa eseptegende bul soma 4,5 mlrd teńgeni quraıdy.

«Mamandarmen keńese kele, jol jóndeý jumystaryna «sýyq resaıklıng» ádisin qoldanamyz. Ol bizdiń klımattyq beldeýimizge dálme-dál keledi. Dymqyldy jaqsy kóteredi», - dedi TKSh bóliminiń basshysy.

Buǵan deıin habarlaǵanymyzdaı , bıyl Qostanaı oblysynda jergilikti mańyzy bar 394 shaqyrym tasjol jóndeledi. Bul týraly búgin «Nur Otan» partııasy oblystyq fılıaly Saıası keńesiniń keńeıtilgen otyrysynda málim boldy.