Qostanaı qalasynyń aınalasynda 7 blokbeket ornatylady
NUR-SULTAN. QazAqparat – Qostanaı qalasy ákiminiń orynbasary Rústem Karkenov búgin saǵat túngi onnan bastap qalada úsh blokbeket jumysyn bastaıtynyn málim etti, dep habarlaıdy QazAqparat tilshisi.
«Oblystaǵy blokbeketter týraly aıta ketsem deımin. Qostanaı qalasynyń perımetri boıynsha qazirgi tańda 7 blokbeket qoıylady. Onyń úsheýi ornatylyp qoıdy. Jumysqa daıyn. Qalǵan tórteýin Qostanaı aýdany ornatady. Birinshi blokbeket Qostanaıdan shyǵa beristegi Veden tas jolynda, ıaǵnı temirjol ótkelinen 300 metr jerge qoıylady. Ekinshisi – Rýdnyı qalasyna burylatyn joldan 300 metr qashyqtyqtaǵy Qonaı kentinde. Úshinshi blok-beket RF baǵytyndaǵy Fedorovsk tas jolynda», - dedi Rústem Karkenov Aımaqtyq kommýnıkatsııalyq qyzmetinde ótken baspasóz máslıhatynda.
Sonymen qatar Qostanaı qalasy ákiminiń orynbasary taǵy tórt blokbeket qaıda ornatylatynyn aıtyp ótti.
«Qostanaı aýdany mynadaı mekenjaı boıynsha blok-beket ornatady: Qostanaı-Chýkovka tasjoly, Qostanaı-Sarykól tasjoly, Qostanaı-Meńdiqara tasjoly, Qostanaı-Áýlıekól tasjoly. Bul blokbeketterdiń bári de qala shetinde turatyn azamattardyń jaǵdaıyn eskere otyryp, ornatylyp otyr. ıAǵnı Tuǵyl, Zarechnoe, Mıchýrın kentterinde turatyn azamattardyń kóbi qalaǵa baryp-qaıtyp júr. Búgin 22.00-den bastap táýlik boıy barlyq sanıtarlyq beketter jumysyn bastaıdy», - dedi ol.
Blokbeketterde 2 medqyzmetker men 4 polıtsııa qyzmetkeri bolady. Aldaǵy ýaqytta polıtsııa qyzmetkerlerin áskerı qyzmetshiler almastyrady.
