Qostanaı qalasynyń 2050 jylǵa deıingi damý strategııasy bekitildi
QOSTANAI. QazAqparat – Oblys ákimi Arhımed Muhambetovtiń qatysýymen oblystyq máslıhat depýtattarynyń kezekten tys sessııasy ótti. Jıyn barysynda Qostanaı qalasynyń 2050 jylǵa deıingi damý strategııasy bekitildi, dep habarlaıdy QazAqparat.
Oblys ortalyǵynyń uzaq merzimdi damý baǵytyn aıqyndaıtyn serpindi strategııany «Ekonomıkalyq zertteý ınstıtýty» AQ jasaǵan. Jańa jobany depýtattarǵa osy ınstıtýtqa qarasty Óńirlerdi zertteý ortalyǵynyń dırektory Qaısar Nyǵmetov tanystyrdy. Ortalyq mamandary aldymen Qostanaı qalasynyń áleýmettik-ekonomıkalyq damýyn taldap, saraptama júrgizgen. Onyń qorytyndysy boıynsha, sońǵy 10 jyl ishinde Qostanaı turǵyndarynyń sany 28 myń adamǵa ósken. Qalada óndiriletin ónerkásip ónimderi 4 ese artsa, negizgi kapıtalǵa kelip túsken ınvestıtsııa kólemi 2 jarym ese ulǵaıyp, byltyr 59 mlrd teńgeden asqan.
Jıyndy oblys ákimi qorytyndylap, Qostanaı qalasynyń jańa damý strategııasynyń asa mańyzdy qujat ekendigine toqtalyp, damý strategııasyn bekitti.
«Bul joba «Nur Otan» partııasy oblystyq fılıalynyń fraktsııa otyrysynda da talqylanǵan. Men ózim esep berdim. Sol esebimde óńirdi damytýdyń barlyq baǵyttary boıynsha málimet jetkizgenmin. Oblys ortalyǵy kún sanap damyp keledi. Jańa shaǵyn aýdandar, jańa kásiporyndar ashylyp jatyr. Óndiris salasy da ilgeriledi. Munymen toqtap qalmaý qajet. Aldaǵy jospar budan da aýqymdy. Búgingi bekitilgen damý strategııasy bizge jańa mindetter júkteıdi», - dedi Arhımed Muhambetov.
Máslıhat depýtattardy qalanyń damý strategııasyn biraýyzdan qoldady.
