Qostanaı qalasyndaǵy 125 lıft qoldanýǵa jaramsyz – ákimdik

QOSTANAI. QazAqparat – Qostanaı qalasynyń ákimi Qaırat Ahmetov Óńirlik kommýnıkatsııalar qyzmetinde ótken brıfıngte jedelsatylardyń qyzmeti týraly aqparat berdi, dep habarlaıdy QazAqparat tilshisi.

Qostanaı oblysynda kóp qabatty turǵyn úı lıftteriniń jaı-kúıi máz emes. Oblys boıynsha qoldanysta 709 lıft bar. Onyń deni jóndeýdi qajet etedi. 289 jedelsatynyń paıdalaný merzimi ótip ketkendikten, bútindeı almastyrý kerek. Aldaǵy 5 jyl ishinde Qostanaı, Lısakov, Rýdnyı qalalaryndaǵy kóp qabatty turǵyn úılerde 300-ge jýyq lıftini jańartý josparlanǵan.

«Qostanaı qalasynda 387 jolaýshy jedelsatysy bar bolsa, onyń 125-i almastyrýdy talap etedi. 114 lıfttiń qoldaný merzimi ótip ketken, qalǵan 11-in kúrdeli jóndeýden ótkizý qajet. Qazir bul máseleni erekshe baqylaýǵa aldyq. Jóndeý jumystaryna qarjy bólinedi», - deıdi Qostanaı qalasynyń ákimi Qaırat Ahmetov.

Qostanaı oblysynyń ákimi apparat májilisinde Arhımed Muhambetov lıft satyp alýdyń naqty jospary bolý kerektigin aıtqan bolatyn.

«Ózderińiz bilesizder, kórshi oblystarda lıfttiń isten shyǵýy saldarynan qaıǵyly jaǵdaılar boldy. Men sizderge árkez eskertip kelemin. Lıft satyp alýdyń arnaıy jospary bolýy qajet. Qazirgi kezde bir lıft 5-6 mln teńge turady. Jyl saıyn 100-150 mln teńge jumsasaq, 30-40 lıftini aýystyrýǵa bolady. Sondyqtan isten shyqqan jedelsatylardy jańartýdyń baǵdarlamasyn jasańyzdar» – deıdi Arhımed Muhambetov.

Aıta keteıik, 2018 jyly Lısakov qalasynda jasóspirim lıftke qysylyp, kóz jumdy. Osy oqıǵadan keıin oblystyń barlyq qalasynda jelesatylarǵa tekserý júrgizildi.