Qostanaı qalasynda jol jóndeýge 4,1 mlrd teńge bólindi
Jaqynda Qostanaı qalasyndaǵy jol jóndeý jumystary bastalady. Bıyl bul maqsatqa 4,1 mlrd teńge qarastyrylǵan. Merdiger kompanııalar jumys aýqymyna qaraı sáýir-mamyr aılarynda iske kirisip, qyrkúıekte aıaqtaýdy josparlap otyr. Bıyl birqatar kóshe qaıta qalpyna keltirilse, jeke sektorlardaǵy qıylystarǵa da jóndeý jasalady. Onyń ishinde 2,7 mlrd teńge qalaishilik joldardyń kúrdeli jóndeý jumystaryna, ortasha deńgeıdegi jumystarǵa 506,3 mln teńge, al aýlalar boıynsha 900 mln teńge bólindi.
«Kún jylynyp, jer kebisimen ótken jyly aıaqsyz qalǵan jumystardy jalǵastyramyz. Atap aıtqanda, Gagarın jáne Sıanov, Abaı jáne Lermontov kósheleriniń arasyndaǵy joldar jóndeledi. Bıyl Táýelsizdik, Pavlov, Chehov kóshelerin de jóndeýden ótkizemiz», - deıdi qalalyq jolaýshylar kóligi jáne avtomobıl joldary bóliminiń basshysy Nuraly Esirgepov.
Sonymen qatar, tórt kóshede kúrdeli jóndeý jumystary osy jyly bastalady. Olar: Qaıyrbekov kóshesiniń Lermontovtan jylyjaı kombınatyna deıingi aralyǵy, Chkalov kóshesiniń Abaı dańǵylynan Gashek kóshesine deıingi bóligi, Altynsarın kóshesiniń Pavlov-Baımaǵambetov ýchaskesi jáne Sıanov kóshesiniń Gogol-Rabochıı aralyǵy jańǵyrtylady.
Al aýlalarǵa ár berý úshin el qazynasynan taǵy 700 mln teńgeden astam qarjy jumsalady.
Qostanaı-2 shaǵyn aýdanynda bıyl tórt kósheni, ıaǵnı Týrgenev, Razdolnyı, Vıshnevyı jáne Samal kóshelerin jóndeý bastalady. Buǵan 110 mln teńgeden astam qarjy bólingen.
Jalpy, 2019 jyly oblysta jergilikti mańyzǵa ıe 394 shaqyrym tasjol jóndeýden ótedi. Bul maqsatta 11,6 mlrd teńge jumsaý kózdelgen.
Eske salaıyq, QR Prezıdenti «Nur Otan» partııasynyń XVIII sezinde 2025 jylǵa qaraı oblystyq jáne aýdandyq mańyzy bar joldardyń 95 paıyzynyń jaı-kúıi aıtarlyqtaı jaqsaratynyn atap ótken edi. Sonymen qatar Elbasy óńirlik kólik ınfraqurylymynyń barlyq nysandary, onyń ishinde áýejaılar, avto jáne temirjol vokzaldary jańǵyrtylýy tıistigin basa aıtty.
