Qostanaı qalasynda jerústi jaıaý júrginshiler ótkeli salynady
QOSTANAI. QazAqparat – Qostanaı oblysynyń ákimi Arhımed Muhambetov Qostanaı qalasy men Qarabalyq aýdanyndaǵy áleýmettik nysandardy aralady, dep habarlaıdy QazAqparat tilshisi.
Oblys ákimi aldymen Qarabalyq aýdanynda bolyp, «Ýrnek-LA» JShS astyq keshenimen tanysty. Kásiporyn astyqty qabyldaý, qaıta óndeý, saqtaý jáne keshendi salý boıynsha qýaty jylyna 30 myń tonna negizinde qyzmet kórsetedi. Jobanyń quny – 1,5 mlrd teńge. Arhımed Muhambetov seriktestik basshylyǵyna astyq saqtaý kezinde barynsha muqııat bolýdy tapsyrdy.
Keıin aımaq basshysy Qarabalyq ortalyq aýdandyq aýrýhanasyna bardy. Aıta ketý kerek, bıyl aýrýhanada jylytý júıesi aýystyryldy.
Aýdandaǵy jumys saparynyń sońynda «Nur Otan» partııasynyń aýdandyq fılıalynda azamattardy jeke qabyldady. Qabyldaýǵa jazylǵan turǵyndardyń basym bóligi TKSh máselelerine qatysty suraq qoıdy. Oblys ákimi árbir ótinishti muqııat tyńdap, jaýapty tulǵalarǵa tıisti tapsyrmalar berdi.
Aımaq basshysy Qostanaı qalasyndaǵy Indýstrıaldy aımaq nysandaryna ınjenerlik kommýnıkatsııalardy júrgizý barysyn qarap shyqty. Odan ári N. Nazarbaev dańǵylyndaǵy jerústi jaıaý júrginshiler ótkeliniń qurylysyn tekserdi. Búginde munda qańqa ornatý jáne tsement-beton jumystary aıaqtaldy.
Merdigerdiń aıtýynsha, jańa jylǵa qaraı osy nysannyń qalǵan jumystary tolyǵymen aıaqtalady. Qostanaı qalasynyń ákimi Qaırat Ahmetovke qala turǵyndaryna yńǵaıly bolý úshin jaıaý júrginshiler ótkeliniń kire berisindegi trotýar men brýschatkany keńeıtýdi tapsyrdy.
Kún aıaǵynda «ıÝbıleınyı» shaǵyn aýdanyndaǵy № 48-50 bes qabatty úıler qurylysynyń barysy tanystyryldy. Ataýly úıler «Nurly jer» memlekettik baǵdarlamasy aıasynda iske asyrylýda jáne kelesi jyldyń shilde aıynda paıdalanýǵa berilmek.
