Qostanaı qalasynda avtobýsta jolaqy qymbattaıdy

QOSTANAI.QazAqparat – Qostanaıda jyl sońyna deıin barlyq avtobýsqa valıdator ornatylady. Bul týraly oblys ákimdiginde ótken jıynda aıtyldy, dep habarlaıdy QazAqparat.

Qoǵamdyq kóliktegi jol júrý tólemin elektrondy formatqa aýystyrý jobasy kópten beri aıtylyp kelgen-di. Áýeli valıdatorlar ár avtobýsqa 2019 jyldyń sońyna qaraı ornatylady dep josparlanǵan. Alaıda ol kezde demeýshi tabylmady . 2020 jyldyń kókteminde jumysty almatylyq kompanııa aıaqtaýǵa tıis bolǵan. Biraq kompanııa qala ákimdigimen kelisimge kele almady.

«Bul - kópten beri kún tártibinen túspeı kele jatqan másele edi. Qazir qala ákimdigi, «Alempay» JShS jáne tasymaldaýshylar arasynda úshjaqty kelisimshart jasalyp jatyr. Barlyq jumysty aıaqtap, valıdatordy osy jyldyń jeltoqsanynda iske qosý josparlanyp otyr. Valıdatorlar engennen bastap elektrondy bılet baǵasy qymbattaıdy. Óıtkeni, jańa júıeni ornatý kóp shyǵyndy qajet etedi. Sondyqtan jol júrý tarıfin ulǵaıtý jóninde sheshim qabyldandy», - deıdi Qostanaı qalasynyń ákimi Qaırat Ahmetov.

Jol qunyn elektrondy túrde tóleıtinder úshin baǵa - 80 teńge bolsa, qolma-qol tólem baǵasy – 150 teńge. Qalalyq TKSh mamandarynyń aıtýynsha, tarıf áli de ózgerýi múmkin, ázirge talqylaý jumystary júrip jatyr.

Qostanaı qalasynda Tsıfrlandyrý baǵdarlamasy sheńberinde «Aqyldy jaryqtandyrý» jobasy engiziledi. Kóshelerdi jaryqtandyrýǵa 513 mln teńge bólingen. Buǵan qosa oblys ortalyǵyndaǵy demalys saıabaqtarynda tegin Wi-Fi paıda bolady.

Atap aıtqanda, Ortalyq skverde, Jastar býlvarynda, Gashek kóshesi boıyndaǵy jaǵalaýda, Jeńis parkinde aqysyz ınternetke kirý múmkindigi ashylady.