Qostanaı qalasynda 40 kóshe jóndeledi
QOSTANAI. QazAqparat – Arhımed Muhambetov Qostanaı qalasynyń joldarynyń jaǵdaıymen tanysty. Aımaq basshysy bul týraly «Instagram» paraqshasynda jazdy, dep habarlaıdy QazAqparat.
Jalpy, 2020 jyly kólik ınfraqurylymyn damytýǵa jáne aýla aýmaqtaryn abattandyrýǵa 6,3 mlrd teńge jumsalady.
«Barlyǵy 40 kóshe jóndeýden ótedi, bul 40,6 shaqyrym. Sondaı-aq 34 shaqyrym jolǵa jańa asfaltbeton salý josparlanýda. Qostanaı qalasynyń basshylyǵyna merdigerlik uıymdar júrgizgen jol tósemderin jóndeý boıynsha jumystardy baqylaýda ustaýdy jáne jumystardy júrgizý merzimderiniń buzylýyna jol bermeýdi tapsyrdym», - dep jazdy óńir basshysy.
Qala ákimdiginiń baspasóz qyzmetinde belgili bolǵandaı, buǵan deıin 10 kóshe ortasha ádispen qaıta jóndeldi. Olardyń arasynda Naberejnyı, Karbyshev, Altynsarın jáne Energetıkter sııaqty birneshe jyl qalypqa kelmegen kósheler bar. Lermontov kóshesinen Baımaǵambetov-Altynsarın kóshelerine shyǵar jol resaıklıng ádisimen jóndeldi.
