Qostanaı qalasyn jańajyldyq bezendirýge 44 mln teńge jumsalady

QOSTANAI. QazAqparat – Qostanaı qalasynyń ákimdigi jańa jyl merekesinde shyrsha ornatyp, muz qalashyǵyn salýǵa 44,1 mln teńge bólgen. Bul týraly QazAqparat tilshisiniń saýalyna jaýap bergen qala ákiminiń baspasóz hatshysy Májıt Shúlenov málim etti.

«Jańajyldyq bezendirý úshin Qostanaı qalasynyń bıýdjetinen 44,1 mln teńge qarastyrylǵan. Onyń ishinde 27,3 mln teńgege 22 metrlik bir, 11 metrlik eki shyrsha, 1 jaryq konstrýktsııasyna, 10 birlik jaryqdıodtyq bezendirý qurylǵylaryna jumsalady. Al 16,8 mln teńge muz qalashyq salýǵa baǵyttalady. Atap aıtqanda, bul qarajatqa 1 jáne 4 jolaqty eki syrǵanaq, bir labırınt, aıaz ata men aqshaqardyń músinderi salynady», - dep jaýap berdi Májıt Shúlenov tilshi saýalyna oraı.

Ákimdik deregi boıynsha 2019 jyly jańajyldyq bezendirýge 44 mln teńge jumsalǵan. Al 2020-2021 jyldary pandemııaǵa baılanysty merekelik sharalar bolmaǵan.