Qostanaı qalasy mańyndaǵy sýǵa túsý bolmaıtyn oryndar anyqtaldy
QOSTANAI. KAZINFORM – Qostanaı qalasynda shomylý maýsymy qarsańynda jabdyqtalǵan jaǵajaılar men qaýipsizdigi joǵary sýǵa túsý oryndarynyń tapshylyǵy máselesi ózekti bolyp tur. Sonyń saldarynan kóptegen turǵyn jaz mezgilinde sý jaǵasyndaǵy arnaıy jabdyqtalmaǵan oryndarda demalyp, jazataıym oqıǵalarǵa tap bolady, dep habarlaıdy Kazinform agenttiginiń óńirdegi tilshisi.
Oblystyq tótenshe jaǵdaılar departamentiniń basshysy Aslan Mahmutovtyń aıtýynsha, sýdaǵy oqıǵalardyń sanyn azaıtý úshin qaladaǵy qaýipti ýchaskelerge 30 tyıym salý belgisin ornatý usynylǵan.
Atalǵan belgiler baý-baqsha seriktestikteri mańynda, Tobyl ózeniniń jaǵasynda, qazanshuńqyrlarda, Koreı kópiri, Gagarın bógeti, QJBI jaǵalaýy, «Tárelochka» kóli aýmaǵynda, sondaı-aq Qonaı jáne Amangeldi shaǵynaýdandarynda qoıylady.
Budan bólek, qosymsha qutqarý munarasyn ornatyp, ony qutqarý sheńberleri men qutqarý keýdeshelerimen jabdyqtaý josparlanyp otyr.
Sondaı-aq Qonaı jáne KSK aýdandarynda qosymsha resmı shomylý oryndaryn ashý múmkindigi qarastyrylyp jatyr. Sebebi aptap ystyq kúnderi turǵyndarǵa bir ǵana qalalyq jaǵajaı jetkiliksiz bolyp otyr.
Gagarın bógeti aýdanynda qorshaýlar ornatý josparlanǵan. Al qaladaǵy LED-ekrandarda sýdaǵy qaýipsizdik týraly beınerolıkter kórsetiledi.
Sonymen qatar jaǵajaılarǵa demalýshylarǵa arnalǵan bannerler men jadynamalar ornalastyrý kózdelgen.
Aıta keteıik, jýyrda ІІM shomylý maýsymynda qaýipsizdik talaptaryn qatań saqtaýǵa shaqyrdy.
Sondaı-aq Astanada shomylýǵa ruqsat etilgen 5 oryn belgilendi.
