Qostanaıdaǵy ındýstrııalyq aımaqtyń ınfraqurylymyna 6,5 mlrd teńgeden asa qarjy bólindi

ASTANA. KAZINFORM – Memleket basshysynyń tapsyrmalaryn júzege asyrý aıasynda Úkimet «Qostanaı» ındýstrııalyq aımaǵyn ınfraqurylymmen qamtamasyz etýge 6,5 mlrd teńgeden astam qarjy bóldi. Premer-mınıstr Oljas Bektenov tıisti qaýlyǵa qol qoıdy. 

6 mlrd 560 mln teńge kólemindegi qarajat Qostanaı qalasyndaǵy ındýstrııalyq aımaqta KIA avtokóligin óndiretin zaýytqa kirme joldary men 3-shi sanattaǵy temirjoldardy salýǵa baǵyttalady.

Aıta ketý kerek, salynyp jatqan KIA avtokólik óndirý zaýyty – eń iri avtomobıl jobalarynyń biri. Zaýyttyń jobalyq qýaty jylyna shamamen 70 myń avtokólikti quraıdy.

Investor 90 mlrd teńge kóleminde qarajat bóldi.

Qazirgi ýaqytta qurylys-montajdaý jumystary men ınjenerlik kommýnıkatsııalar júrgizýge 500-den astam adam jumyldyrylǵan. Joba aıasynda barlyǵy 1,5 myń jumys ornyn ashý kózdelgen.

Zaýyt 2025 jyldyń qazan aıynda iske qosylady dep josparlanyp otyr. Kásiporyn aımaq pen elimizdiń damýyna úlken serpin beredi, sondaı-aq óndiristi lokalızatsııalaý deńgeıin aıtarlyqtaı arttyrady. Zaýyt dánekerleý, syrlaý jáne kólik qurastyrý sııaqty tolyq tsıkldi negizde jumys isteıdi.

Esterińizge sala keteıik, qazirgi tańda Qostanaı qalasynyń Indýstrııalyq aımaǵy aýmaǵynda 5 joba iske qosylǵan. 9 joba belsendi túrde pysyqtalyp jatyr.

Osylaısha, ındýstrııalyq aımaq aýmaǵynda kólik ınfraqurylymyn salý barlyq iske asyrylyp jatqan jobalardyń tıimdi jumys isteýi úshin qajetti jaǵdaı jasaıdy. Jańa kirme joldar men temirjoldar úzdiksiz logıstıkany qamtamasyz etip, shıkizat jetkizý isin jedeldetedi, sondaı-aq daıyn ónimdi ishki jáne syrtqy naryqtarǵa tasymaldaýdy jeńildetedi.