Qostanaı halqynyń 85 paıyzdan astamy ulttyq sanaqtan ótti
QOSTANAI. QazAqparat – Qostanaı oblysyndaǵy halyq sanaǵynyń aralyq qorytyndysyn búgin oblys ákiminiń orynbasary Erlan Spanov brıfıng barysynda málim etti, dep habarlaıdy QazAqparat tilshisi.
«Búgingi kúnde Qostanaı oblysy halqynyń 85,6%-ǵa jýyǵy nemese 737 634 adam sanaqqa qatysty, onyń ishinde 476 046 adam nemese 55,3%-y suhbat alýshylardyń suraqtaryna oflaın jaýap berdi, 261588 adam nemese halyqtyń 30,4%-y sanaqtan onlaın óz betinshe ótti»,- dep habarlady oblys ákimiiń orynbasary.
Sanaqqa eń kóp qatysýshylar Naýyrzym aýdanynda (97,5%), Qostanaı (95,8%), Fedorov (95,2%), Denısov (94,4%), Jangeldın (94,3%) aýdandarynda, sondaı-aq Arqalyq qalasynda (95,7%) baıqalady.
Oblysta halqynyń 90%-dan astamy sanaqtan ótken tórt aýdan bar. Olar:Altynsarın aýdany-90,8%, Rýdnyı qalasy - 90,7%, Uzynkól aýdany - 90,1%, Amangeldi aýdany - 90,0%.
«Qalǵan 8 aýdanda jáne qalada sanaqqa halyqtyń 85%-dan astamy qatysqan. Qostanaıda halyqtyń 78,7% -y sanaq suraqtaryna jaýap berdi, onyń ishinde 68 myńnan astamy nemese 27,2%-y onlaın-sanaqtan ótken»,- dep atap ótti Erlan Spanov.
Oblys ákiminiń orynbasary azamattardy sanaqqa belsendi túrde qatysýǵa shaqyrdy.
Erlan Spanov atap ótkendeı, sanaq derekteri áleýmettik-ekonomıkalyq, demografııalyq máselelerdegi jaǵdaıdyń tolyq kórinisi, durys josparlaý men esepteýler úshin mańyzdy bolmaq.
