Qostanaı fenomeni: Oblystaǵy koronavırýspen kúresken dárigerlerge syıaqy berile me

NUR-SULTAN. QazAqparat - QR Densaýlyq saqtaý mınıstri Eljan Birtanov bir de bir koronavırýs ınfektsııasy tirkelmegen Qostanaı «fenomeni» týraly pikir bildirdi, dep habarlaıdy QazAqparat.

«Naýryz aıynyń basynda «Qazaqstanda nege eshkim aýyrmady? Qazaqstan fenomeniniń syry nede? Ne jasyryp júrsizder?» degen suraqtar kóp qoıylatyn. Munda eshqandaı fenomen joq, ınfektsııa taralýynyń tabıǵı mehanızmi bar. Ol adamdardyń qozǵalysyna, tyǵyzdyǵyna, karantındik sharalarǵa tikeleı baılanysty», - dep atap ótti mınıstr Ortalyq kommýnıkatsııalar qyzmetindegi brıfıngte.

Mınıstr Qostanaı oblysyndaǵy medıtsınalyq mamandardyń kúsheıtilgen jumysynyń jaqsy nátıje bergenin atap ótti.

«Aldaǵy ýaqytta da olarǵa tabysty jumys tileımin. Naýqastar tabylǵan soń da, onyń jappaı taralýyna jol berilmeýi tıis. Qostanaı obylsynyń dárigerleri tolyǵymen daıyn otyr», - dedi E. Birtanov.

Sonymen birge, vedomstvo basshysy aýrý tirkelmegen qńirdiń dárigerlerine syıaqy berý týraly suraqqa jaýap berdi.

«Syıaqy qostanaılyq dárigerlerdi qosqanda, koronavırýs indetimen kúresip júrgen barlyq mamandarǵa beriledi. Ásirese, kelýshilerdi qabyldap, tekserip jatqan karantındik statsıonarlardyń jumysy orasan. Sondyqtan, bul máselede esh geografııalyq shekteý bolmaıdy», - dedi E. Birtanov.