Qostanaı eti AQSh-qa eksporttalmaq
Qostanaı oblysyna AQSh-tan 18 delegat keldi. Meımandar saparynyń maqsaty - Tobyl óńiriniń Agroónerkásip keshenine tıesili jobalardy júzege asyrý múmkindikterimen tanysý. Delegatsııa quramynda Tyson Fresh Meat Inc., Global Beef Investors, ANIMART Dairy & Livestock Solutions, VALLEY, VALMONT Irrigation, 3rd Millennium Genetics LLC syndy belgili álemdik kompanııalardyń jetekshileri men aktsıonerleri jáne qazaqstandyq kásipker, KUSTO GROUP Dırektorlar keńesiniń tóraǵasy Erkin Tátishev bar. Aıta keteıik, Tyson Fresh Meat Inc - sıyr jáne shoshqa etin jetkizýshi álemdegi kóshbasshy kompanııalardyń biri.
Jumys saparynyń baǵdarlamasy boıynsha delegattar óńirdiń kóptegen áleýetti nysanyn aralaıdy. Qonaqtar búginniń ózinde aýylsharýashylyq ónimderin óńdeıtin jáne azyq-túlik ónimderin óndiretin birqatar kásiporynda bolyp úlgerdi. Atap aıtqanda, olar «MILH», «Sadchıkovskıı», «Qarasý-Et» syndy seriktestikterdiń jumysymen tanysty. Oblys ákiminiń birinshi orynbasary Ǵaýez Nurmuhambetov pen oblys ákiminiń orynbasary Meıirjan Myrzalıev Qostanaı qalasyndaǵy Indýstrııalyq aımaqta delegatsııamen kezdesý ótkizdi. Ol jerde meımandarǵa oblystyń ınvestıtsııalyq áleýeti tanystyrylyp, óńirdiń AÓK damytýdyń basym baǵyttary men ınvestjobalardy iske asyrýǵa kórsetilip otyrǵan memlekettik qoldaý sharalary týraly málimdeldi. Ásirese, aýyl sharýashylyǵy daqyldaryn óńdeý turǵysynda keń maǵlumat berildi. Investorlar óńirdiń úlken áleýetke ıe ekenine kóz jetkizgenderin aıtty. Oǵan qosa, barlyq jaǵdaı, baı resýrs, shıkizattyq baza jáne memleket tarapynan tolyq qoldaýdyń baryna oń baǵa berdi. Jalpy, delegatsııa tek et salasynda ǵana emes, ósimdik daqyldaryn ósirýde, sút ónimderin óndirýde jáne t.b. jobalardy júzege asyrý múmkindikterin qarastyrady.
10 qarashada olar oblys ákimi Arhımed Muhambetovpen kezdesip, sapar qorytyndysy retinde ózara áriptestikti talqyǵa salady. Eki tarap kelisse, Qostanaı sharýalarynyń eti AQSh-qa tasymaldanady. 
