Qostanaı emhanalaryna 20 sanıtarlyq kólik tapsyryldy

QOSTANAI. QazAqparat – Búgin Qostanaı oblysynyń aýdan-qalalaryndaǵy aýrýhanalarǵa «ÝAZ» markaly 20 sanıtarlyq kólik tapsyryldy, dep habarlaıdy QazAqparat oblys ákiminiń baspasóz qyzmetine silteme jasap.

Pandemııaǵa qarsy kúres aıasynda oblysta medıtsınalyq uıymdardyń materıaldyq-tehnıkalyq bazasyn jaqsartý jumystary jospar boıynsha belsendi júzege asýda. Sonyń bir mysaly – emhanalarǵa sanıtarlyq kólikterdiń tapsyrylýy.

Qazaqstandaǵy reseılik «ÝAZ» markaly avtomobılderdiń resmı dıstrıbıýtory «Vıraj» kompanııalar toby 30 avtokólikti oblys óńirlerine qurastyryp berýge kelisken. Búgin sonyń 20-sy berildi. Qalǵan 10-y jaqyn arada paıdalanýǵa usynylady.

Kólik tapsyrý rásimine oblys ákimi Arhımed Muhambetov arnaıy bardy. Oblys ákimine kólik sapasy men kabınaǵa jabdyqtalatyn medıtsınalyq qurylǵylar týraly aqparat berildi. Sanıtarlyq kólikterdi satyp alýǵa 184 mln teńge jumsalǵan

Aıta ketý kerek, buǵan deıin, osy jyldyń sáýir aıynda oblys basshylyǵy naq osyndaı 80 sanıtarlyq kólik satyp alyp, qalalar men aýdandarǵa úlestirilgen edi.

Jalpy, óńir aýrýhanalaryn suranysqa ıe qyzmettik kólikpen qamtý – medıtsınalyq uıymdarǵa pandemııa kezeńinde kórsetilgen úlken qoldaý, sondaı-aq aýdandardaǵy sanıtarlyq transport bazasyn jańartý máselesin túbegeıli sheshýge jasalǵan mańyzdy qadam ekeni sózsiz.