Qostanaı dala festıvalinde óńirdiń agroónerkásip keshenindegi jetistikteri kórsetildi
QOSTANAI. KAZINFORM — Qostanaı oblysynyń 90 jyldyǵy aıasynda «Qostanaı dala festıvali» atty agrofestıvali uıymdastyrylyp, «Qazaqstandyq Dala kúni — Jańa Dala / Green Day 2026» halyqaralyq kórmesi ótti. Kórmede óńirdiń agroónerkásip kesheniniń jetistikteri tanystyryldy.
Qostanaı oblysynyń ákimi Qumar Aqsaqalovtyń aıtýynsha, aýyl sharýashylyǵy ókilderin, tehnıka óndirýshilerin, ǵalymdar men myńdaǵan qonaqtyń basyn qosqan bul is-sharanyń aýqymy óńirdiń aıshyqty belgisine aınalatyn jańa dástúrdiń bastaýy sanalady.
Óńir ákimi mal sharýashylyǵy salasyn damytýǵa erekshe toqtalyp, ony agroónerkásip keshenindegi mańyzdy baǵyt retinde atap ótti.
— «Igilik», «Bereke» jáne «Jaılaý» baǵdarlamalary aıasynda ımporttyq asyl tuqymdy 14,2 myń bas maldy satyp alýǵa jalpy quny 20 mlrd teńgelik 21 jobadan turatyn pýl qalyptastyryldy. Eki jylda óńirde jeti zamanaýı sút-taýarly fermasy iske qosyldy, sondaı-aq taǵy altaýynyń qurylysy jalǵasyp jatyr. Al bıyl taǵy úsh jańa jobany júzege asyrý bastalady, — dedi Qumar Aqsaqalov.
Mal sharýashylyǵyndaǵy jetistikter aıqyn kórinip tur. Qostanaı oblysynyń toǵyz sharýashylyǵy asyl tuqymdy 44 mal basyn usynyp, sonyń arasynda 10 buqa «Qostanaı oblysynyń eń aýyr buqasy» baıqaýyna qatysty.
Atap aıtqanda, Áýlıekól aýdanyndaǵy «Moskalevskoe» JShS sharýashylyǵy qazaqtyń aqbas etti tuqymyna jatatyn buqalardy alyp keldi. Olardyń keıbiriniń salmaǵy 1200-1300 kelige deıin jetedi.
— Mundaı kórmeler aýyl sharýashylyǵy taýarlary óndirýshilerine óz jumystaryn áleýetti satyp alýshylarǵa tikeleı tanystyrýǵa múmkindik beredi», — deıdi sharýashylyq veterınary Jaslan Sabyrbek.
Kórmede otandyq selektsııa salasyndaǵy jetistikter men ǵylymı uıymdardyń eńbegine erekshe nazar aýdaryldy. Bul rette «Qarabalyq aýyl sharýashylyǵy tájirıbe stantsııasy» JShS egistik alqaptary tanystyryldy. Onda agrarlyq sala mamandaryna Qazaqstannyń soltústik óńirlerindegi klımattyq jaǵdaıǵa beıimdelgen dándi daqyldardyń jańa suryptary kópshilik nazaryna usynyldy.
Atap aıtqanda, festıval uıymdastyrylǵan aýmaqta oblystyń aýdandary men qalalary arnaıy etnoaýyl quryp, qonaqtarǵa qazaqtyń salt-dástúrimen, qolónerimen jáne ulttyq taǵamdarymen tanysýǵa múmkindik berildi. Balalarǵa arnalǵan ondaǵan ınteraktıvti alańdar jasaqtalyp, shyǵarmashylyq alańdary, mototsıkl qurastyrý, tanymdyq baǵdarlamalar jáne otbasylyq jarystar sııaqty qyzyqty is-sharalar uıymdastyryldy. Sonymen qatar, sport súıer qaýym dástúrli ulttyq oıyndarda óz baqtaryn synap kórý múmkindigine ıe boldy.
Alǵash ret Agro Fashion Week jobasy da agrofestıvaldiń bir bóligine aınaldy. Qostanaı oblysynyń dızaınerleri men Astananyń tanymal brendteri podıýmda zamanaýı sán úrdisi men ulttyq naqyshty úılestire otyryp, óz toptamalaryn kópshilik nazaryna usyndy.
Munymen qosa, jergilikti óndirýshiniń arnaıy jumys kıimderi de kórsetildi.
Kazakhstan Fashion Week Astana uıymdastyrýshysy Farıza Seıilhan atalǵan jańa toptamany tanystyrý tujyrymdamasy óńirdiń ereksheligin aıshyqtaý maqsatynda arnaıy «Jańa Dala / Green Day» is-sharasy úshin ázirlengenin atap ótti.
Aıta keteıik, Memleket basshysy Qasym-Jomart Toqaev Qostanaı oblysynyń qurylǵanyna 90 jyl tolýyna arnalǵan saltanatty is-sharaǵa qatysýshylardy quttyqtady.
