«Qostanaı dala festıvali»: agroónerkásiptiń jańa múmkindikteri tanystyryldy
QOSTANAI. KAZINFORM - Qostanaı oblysynda «Qostanaı dala festıvali» aıasynda halyqaralyq «Qazaqstannyń Dala kúni – Jańa Dala / Green Day ’2026» kórmesi uıymdastyryldy. Aýqymdy sharaǵa álemniń 20-dan astam elinen agrobıznes ókilderi, ǵalymdar, memlekettik organdardyń basshylary men aýyl sharýashylyǵy tehnıkasy naryǵynyń ókilderi bas qosty.
Agrofestıvaldiń ashylý saltanatynda Qostanaı oblysynyń ákimi Qumar Aqsaqalov bul shara óńirdiń jańa dástúrine aınalyp, Qazaqstandaǵy eń iri agrarlyq kórmeniń birine aınalýy tıis ekenin atap ótti.
– Bul festıval óńirdiń ozyq dástúrlerin saqtap qana qoımaı, jańa bastamalarǵa jol ashady. Biz ony aýyl turǵyndaryna da, qala halqy úshin de qyzyqty, otbasymen kelip demalatyn tanymal orynǵa aınaldyrǵymyz keledi, – dedi óńir basshysy.
Ákimniń aıtýynsha, búginde agroónerkásip kesheniniń damýyna memleket buryn-sońdy bolmaǵan qoldaý kórsetip otyr. Bıyl Qostanaı oblysyna bul salaǵa 275 mlrd teńge bólindi. Bul ótken jylmen salystyrǵanda 33 paıyzǵa kóp. Sońǵy bes jylda aýyl sharýashylyǵyn qarjylandyrý kólemi 3,6 esege artqan. Tek bıyldyń ózinde óńir sharýashylyqtary 799 birlik jańa aýyl sharýashylyǵy tehnıkasyn satyp aldy. Onyń shamamen 90 paıyzy Qostanaıdaǵy kásiporyndardy qosa alǵanda, otandyq zaýyttarda shyǵarylǵan.
Aýyl sharýashylyǵy mınıstri Aıdarbek Saparov mundaı aýqymdy agrofestıvaldiń Qostanaı oblysynda ótýi zańdy ekenin aıtty. Sebebi óńir elimizdegi astyq óndiretin basty ortalyqtardyń biri sanalady.
– Memleket basshysy Qasym-Jomart Toqaev agroónerkásip keshenin joǵary tehnologııaly ári básekege qabiletti salaǵa aınaldyrý mindetin qoıyp otyr. Memlekettik qoldaýdyń arqasynda aýyl sharýashylyǵy sońǵy úsh jyl qatarynan turaqty ósim kórsetti, – dedi mınıstr.
Kórmeni uıymdastyrýshy Ádilhan Saǵymbaevtyń aıtýynsha, bıylǵy format Dala kúni jobasynyń tarıhyndaǵy eń aýqymdysy boldy.
Festıval alǵash ret úsh kúnge josparlanyp, agrotehnologııalar kórmesimen qatar aýqymdy mádenı baǵdarlamany da qamtıtyn bolady.
Bıyl sharaǵa 26 elden kelgen 150-ge jýyq kompanııa aýyl sharýashylyǵyna arnalǵan zamanaýı tehnıka, jabdyqtar men ınnovatsııalyq sheshimderin tanystyrdy.
Uıymdastyrýshylardyń aıtýynsha, festıvaldiń basty maqsaty – Qazaqstannyń aýyl sharýashylyǵynyń aldaǵy jyldary qandaı baǵytta damıtynyn kórsetý jáne jastardyń agrarlyq mamandyqtarǵa degen qyzyǵýshylyǵyn arttyrý.
Kórmeniń eń iri alańdarynyń biri zamanaýı aýyl sharýashylyǵy tehnıkasyna arnaldy. Munda traktorlar, astyq jınaıtyn kombaındar, ózdiginen júretin búrikkishter, egis keshenderi, topyraq óńdeý tehnıkalary, agrodrondar jáne agroónerkásipke arnalǵan ózge de tehnologııalyq sheshimder kópshilik nazaryna usynyldy. Óz ónimderin elimizdiń jáne sheteldiń jetekshi óndirýshileri tanystyrdy.
Qatysýshylar qatarynda otandyq aýyl sharýashylyǵy mashınasyn jasaýdaǵy jetekshi kásiporyndardyń biri – «Agromash» zaýyty da boldy. Kásiporynnyń marketıng bóliminiń basshysy Batyr Ospanovtyń aıtýynsha, zaýyt traktor, kombaın jáne aspaly aýyl sharýashylyǵy tehnıkalaryn shyǵarady. Jyldyq mólsherlemesi 5 paıyz bolatyn jeńildetilgen nesıe men tehnıka qunynyń 30 paıyzyn sýbsıdııalaý tetiginiń arqasynda bul tehnıkalar sharýalar úshin qoljetimdi bolyp otyr. Kórmede Lovol traktorlary men «Esil» kombaındary usynyldy.
Sheteldik kompanııalar da ózderiniń jańa ázirlemelerin tanystyrdy. Solardyń biri – Brazılııanyń Jacto kompanııasynyń GPS-navıgatsııa júıesimen jabdyqtalǵan ózdiginen júretin búrikkishi. Kompanııa menedjeri Sergeı Býıalskııdiń aıtýynsha, tehnıka óńdelmeı qalǵan alqaptardy avtomatty túrde anyqtap, ósimdikti qorǵaý quraldarynyń shyǵynyn 10–15 paıyzǵa deıin qysqartýǵa múmkindik beredi.
Festıval aıasynda kórmemen qatar iskerlik kezdesýler, bilim berý jáne mádenı is-sharalar da uıymdastyryldy. Uıymdastyrýshylardyń pikirinshe, «Qostanaı dala festıvali» aldaǵy ýaqytta ınnovatsııalardy tanystyratyn, ınvestıtsııa tartatyn jáne elimizdiń agroónerkásip kesheniniń damýyna serpin beretin dástúrli halyqaralyq alańǵa aınalmaq.
Buǵan deıin elimizde tamyz aıynda bes iri festıval ótetinin jazǵan edik.
