Qostanaı: Batyr músinin súrýdegi qatelikter úshin ákim keshirim surady
QOSTANAI. QazAqparat - Qostanaı oblysy Qarabalyq aýdanynyń ákimi Nurjan Ótegenov Qazaq handyǵynyń 550 jyldyǵyna oraı ornatylǵan eskertkishtiń súrilýi kezinde jiberilgen óreskel buzýshylyqtar úshin keshirim surady, dep habarlaıdy QazAqparat «Qostanaı jańalyqtary»portalyna silteme jasap.
Atap ótilgendeı, beısenbi, 6 qyrkúıek kúni oblystyq baspasóz-klýbynda jospardan tys brıfıng ótti. Oǵan Qarabalyq aýdanynyń ákimi Nurjan Ótegenov pen ákim apparatynyń biraz bóligi Batyrǵa arnalǵan eskertkishtiń buzylýyna qatysty óz ustanymdaryn bildirý úshin kelgen.
«Merdiger óreskel buzýshylyqqa, qatelikke jol bergen. Sol kúni tańerteń jeke ózim, qurylys bóliminiń ókilderi jáne aýyl ákimi sol jerde boldyq. Jumysshylarǵa: Jigitter, abaılap túsirińder. Qaz-qalpynda bolsyn. Shatynap, jarylyp jatsa, kesińder, ony keıin qalpyna keltiremiz» delindi. Taǵy qaıtalap ótemin, olar úlken buzýshylyqqa jol bergen. Keıin bizge túsindirgendeı, músindi kótermek bolǵan. Biraq bir jeri shytynap ketken. Sodan keıin osylaısha súrýge sheshim qabyldaǵan. Batyr músinin qaıta montajdaý kezinde jiberilgen óreskel buzýshylyq úshin jergilikti qoǵamdastyqtan keshirim suraımyn. Biraq budan biz - qarabalyqshylar qazaq halqyna jáne Qazaq handyǵyna qarsymyz degen túıin jasaýdyń qajeti joq. Bul olaı emes», - dedi aýdan ákimi Nurjan Ótegenov.
Sondaı-aq ol aýdan ákimi qyzmetine jýyrda ǵana kiriskenin atap ótti. Sol kezde oǵan Ardagerler keńesi men qolastyndaǵy qyzmetkerleri eskertkish jóndeýdi qajet etetinin jáne onyń syrtqy kelbetin qalpyna keltirgisi keletinderin jetkizgen.
«Kóktemgi jáne kúzgi aýa raıynan keıin onyń tuǵyry otyrdy jáne kishi sáýlettik nysannyń buzylýynyń alǵashqy belgileri baıqala bastady. Aldymen artqy bóligi qırap tústi. Ony jóndep qoıdyq. Keıin jaryla bastady. Osydan soń ony qaıta jóndeý usynysy jasaldy», - dedi ol.
Brıfıng barysynda anyqtalǵandaı, ákimdik qyzmetkerleriniń qolynda eskertkishtiń múshkil jaǵdaıyn dáleldeıtin birde-bir fotosýret bolmaı shyqty. Aýdan bıliginiń aıtýynsha, músin eskertkishke jatpaıdy jáne ol QR Mádenıet jáne sport mınıstrliginiń reestrinde tirkelmegen. Jumsalǵan qarjy kólemi 1 mln teńgege jýyq.
«Ony aýystyrý týraly sheshim bıylǵy sáýir aıynda qabyldandy. 2015 jyly demeýshilik qoldaý kórsetken kásipkerler bul týraly eskertildi», - dedi aýdan basshysy.
Qostanaı oblysy Qarabalyq aýdanynda Qazaq handyǵynyń 550 jyldyǵyna arnap ornatylǵan eskertkish qıratylǵany týraly buǵan deıin habarlaǵan bolatynbyz. Eskertkishtiń súrilip jatqan vıdeosy áleýmettik jelide tarady. Sol kúni aýyl ákimi QazAqparat tilshisine bergen jaýapqa sáıkes, qıraýǵa shaq qalǵan músin basqa eskertkishpen almastyrylady.
«Jańa nysan taza qoladan jasalady jáne burynǵy eskertkishten 50-70 santımetrge bıik bolady. Ol úshin Almaty qalasyna tapsyrys berildi. Qazan aıynyń alǵashqy onkúndiginde ákelinedi. Jańa eskertkishke Qarabalyq batyrdyń esimi beriledi , - degen edi Qarabalyq aýylynyń ákimi Asan Shektibaev.
