Qostanaı balabaqshasyndaǵy jemqorlyq: dırektor orynbasary sottaldy
QOSTANAI. QazAqparat - Búgin Qostanaıda QR QK 368-baby, 2-bóligi (paraqorlyqqa deldal bolý) boıynsha aıyp taǵylǵan 45 jastaǵy Aıgúl Tobylbaevaǵa úkim shyqty. Tobylbaeva sot zalynda qamaýǵa alyndy, dep habarlady «QazAqparat» HAA tilshisi oblystyq sottyń baspasóz qyzmetine silteme jasap.
Oblystyq sottyń aqparatyna sáıkes, shilde aıynda balabaqsha dırektorynyń mindetin atqaryp júrgen Tobylbaeva aýyr jemqorlyq qylmysyn jasaǵan. Jalpy quny 3 490 000 teńgege jasalǵan memlekettik satyp alýlar jónindegi kelisimge sáıkes «B» jeke kásipkerligi balabaqshanyń shatyryna aǵymdaǵy jóndeý jumystaryn óz ýaqytynda aıaqtaǵan. Tapsyrysty berýshi balabaqsha dırektory R. Hajıeva deldal retinde sol mekeme dırektorynyń orynbasary Tobylbaevany paıdalanyp, kelisim qunynyń 10%-y kóleminde para talap etken. 26 shildede Qostanaı aýdanynyń Mıchýrıno aýylynda Hajıeva deldal Tobylbaeva arqyly 350 myń teńge kóleminde para túrindegi aqshany alyp jatqan jerinen ustaldy.
Búgin sottyń úkimimen A. Tobylbaeva aıypty dep tabyldy. Sot oǵan múlkin tárkileı otyryp, eki jylǵa bas bostandyǵynan aıyrý jazasyn belgiledi. Sondaı-aq ol ómir boıy memlekettik mekemelerde uıymdastyrý-ákimshilik nemese ákimshilik-sharýashylyq qyzmettermen baılanysty laýazymdardy atqarý quqyǵynan aıyryldy. Sottalýshy jazany qylmystyq-atqarý júıesiniń qaýipsizdik deńgeıi ortasha mekemesinde óteıdi.
Úkim zańdy kúshine engen joq.
Buǵan deıin habarlaǵanymyzdaı, 350 myń teńge kóleminde para aldy dep aıyptalǵan №14 balabaqsha dırektory Raısa Hajıevaǵa Qostanaı qalalyq №2 sotynda 2 jylǵa bas bostandyǵynan aıyrý jazasy belgilengen bolatyn.
