Qostanaı balabaqshalary qujattardy zańsyz suratyp otyrǵan

QOSTANAI. QazAqparat - Balalardy balabaqshalarǵa tıisti qujattarsyz qabyldamaǵany úshin mektepke deıingi uıymdardyń dırektorlary tártiptik jaýapkershilikke tartyldy, dep habarlaıdy QazAqparat oblystyq sybaılas jemqorlyqqa qarsy kúres departamentiniń baspasóz qyzmetine silteme jasap.

Memlekettik qyzmet standartynyń qazirgi normasy boıynsha, balalardy mektepke deıingi bilim berý uıymdaryna qabyldaý úshin ata-analar men olardyń zańdy ókilderinen qujattardyń 3 túri ǵana suratylady. Olar: qabyldaýǵa arnalǵan joldama (berilgen kúnnen bastap 5 jumys kúni ishinde jaramdy), ata-anasynyń biriniń nemese zańdy ókiliniń jeke basyn kýálandyratyn qujat, balanyń týý týraly kýáligi. 

Degenmen, «Qupııa satyp alýshy» ádisimen júrgizilgen zertteýler Qostanaı qalasynyń mektepke deıingi uıymdaryna balalardy qabyldaý kezinde artyq qujattar suralǵanyn kórsetti. 

«Qostanaı qalasynyń balabaqshalary ata-analardan basqa da qujattardy, atap aıtqanda, ata-analardan jeke basyn kýálandyratyn qujat kóshirmesin, balanyń týý týraly kýáliginiń kóshirmelerin, 0-63 egý nysandaryn talap etken. Osylaısha, «Qujattardy qabyldaý jáne balalardy mektepke deıingi uıymdarǵa qabyldaý» memlekettik qyzmet standarty buzyldy. Departamenttiń memlekettik qyzmetterdi kórsetý tártibin buzǵany týraly bergen hattarynyń qorytyndylary boıynsha Qostanaı qalasynda 4 balabaqsha dırektorlary mindetterin atqarýshylar tártiptik jaýapkershilikke tartyldy. Olar: №5, 7, 14, 61 bóbekjaılary. Atalǵan uıym ókilderine tártiptik jazalar jarııalandy», - dedi departamenttiń baspasóz hatshysy Aıda Bajırova.

Aldaǵy ýaqytta mundaı faktilerge jol bermeý maqsatynda departament qyzmetkerleri mektepke deıingi uıymdardyń basshylaryna arnaıy habarlamalar jiberdi.