Qostanaı avtobýstarynda qolma-qol tólem toqtatylýy múmkin
ASTANA. KAZINFORM — Qostanaıda qalalyq jáne qala mańy baǵytyndaǵy avtobýstarda jolaqyny tek qolma-qol aqshasyz tóleý júıesine kóshý máselesi qarastyrylyp jatyr.
Qalanyń jol jáne kólik ınfraqurylymyn damytýǵa arnalǵan baıandamada qalalyq jáne qala mańy baǵyttaryndaǵy jolaýshylar tasymalyna biryńǵaı tarıf engizý týraly qaýly jobasy ázirlengeni aıtylǵan.
Joba qabyldansa, jolaýshylar avtobýs júrgizýshisine qolma-qol aqsha berip, jolaqy tóleı almaıdy.
Onyń ornyna jolaqyny mobıldi qosymshalar, uıaly baılanys operatorlarynyń qyzmetteri, bank kartalary men kólik kartalary arqyly tóleýge bolady.
Mundaı júıe Almatyda da qoldanylady. Qostanaıda jańa tártipti engizý jolaýshylar sanyn esepke alýdy jeńildetip, avtobýsqa otyrý ýaqytyn qysqartýǵa jáne jolaqy tóleýdi ońaılatýǵa múmkindik beredi dep josparlanyp otyr.
2026 jylǵy 1 tamyzdan bastap Qostanaıdaǵy elektrondy jolaqy tóleý júıesiniń operatory bolyp «SMS BUS» JShS belgilendi. Buǵan deıin shyǵarylǵan ALEMPAY kólik kartalary burynǵydaı qoldanysta qalyp, olardy tolyqtyrýǵa da bolady.
Qostanaıdyń marshrýttyq jelisine 40 avtobýs baǵyty kiredi. Onyń 22-si qalalyq, 18-i qala mańy baǵyttary. Bul baǵyttarǵa qyzmet kórsetý úshin 289 avtobýs qarastyrylǵan. Alaıda kún saıyn jelige 190 avtobýs shyǵady.
Olardyń 155-i jeti jyldan az ýaqyt paıdalanylsa, qalǵan 35 avtobýstyń qoldanysta júrgenine jeti jyldan asqan. Avtobýs parki kezeń-kezeńimen jańartylyp jatyr. 2027 jyly tasymaldaýshylar Yutong markaly taǵy 19 avtobýs satyp alýdy josparlap otyr.
Ákimdik málimetinshe, 2021-2025 jyldary Qostanaıdyń qoǵamdyq kóligindegi jolaýshylar aǵyny 9,5 mıllıon adamǵa nemese 30,5 paıyz artqan. Al 2026 jyly bul kórsetkish byltyrǵy deńgeıge jýyq saqtalǵan.
Eske salaıyq, buǵan deıin Aqtaýda balalar jolaqysyn jalpy tarıfpen tóleýge májbúr bolǵanyn jazǵan edik.