Qostanaı aýmaǵynda zańsyz júrgen tájikstandyqqa aıyppul salyndy
QOSTANAI. QazAqparat - Qostanaı oblysy Qarabalyq aýdandyq soty Tájikstan azamatyna qatysty ákimshilik quqyq buzý týraly isti qarady, dep habarlaıdy QazAqparat oblystyq sottyń baspasóz qyzmetine silteme jasap.
«Tájikstan azamaty QR aýmaǵyna 2019 jylǵy 27 sáýirde «tranzıt» arqyly kirgen. Kóshi-qon kartasyn alǵannan keıin 5 kún ishinde Qazaqstan Respýblıkasynyń aýmaǵynan shyqpaǵan. Osylaısha, ol Qazaqstanda 24 táýlik zańsyz bolǵan, sóıtip kóshi-qon salasyndaǵy zańnamany buzdy», - dep habarlady oblystyq sottyń baspasóz qyzmetinen.
Zań buzýshy azamat sottan aıyppul túrinde ákimshilik jaza qoldanýdy surap, ony tóleýge daıyn ekenin málim etti.
Sot qaýlysy boıynsha azamat K. QRÁK 517-baby, 2-tarmaǵy boıynsha ákimshilik jaýapkershilikke tartylyp, 15 AEK kóleminde aıyppul tóledi. Qaýly zańdy kúshine engen joq.
