Qostanaı áýejaıy ekinshi ret satylmaı qaldy
QOSTANAI. QazAqparat - Qostanaı halyqaralyq áýejaıy jekeshelendirýdiń ekinshi kezeńi aıasynda saýdaǵa qoıyldy, dep habarlaıdy «QazAqparat» HAA tilshisi gosreestr.kz saıtyna silteme jasap.
Áýelde, halyqaralyq áýejaıdy satyp alý quqyǵy boıynsha senimdi basqarýǵa berý tenderin ótkizý 2017 jylǵy 20 jeltoqsanǵa josparlanǵan. Alaıda, ótinim túspegen soń tender ótkizilmedi. Dál osyndaı jaǵdaı búgin de qaıtalanyp otyr.
«Saýda-sattyqtar bastalý ýaqytynda tenderge (konkýrs) qatysýshylar ótinimderiniń ekiden kem bolýy sebebinen nysan ótpedi», - dep kórsetilgen Qazaqstan Respýblıkasy Qarjy mınıstrliginiń Memlekettik múlik jáne jekeshelendirý komıtetiniń veb-portalynda.
Endi úshinshi satylym barysynda jekeshelendirý sharttary ózgertiledi. Kepildik jarnasy 129,3 mln teńgege teń bolmaq.
Aıta keteıik, atalǵan nysan Qazaqstan Respýblıkasy Investıtsııalar jáne damý mınıstrliginiń balansynda tur. Ol Qostanaı qalasy tóńireginiń ońtústik-batys jaǵynan 2 shaqyrym jerde jáne ákimshilik ortalyǵynan 5,6 shaqyrym qashyqtyqta ornalasqan. Áýejaı halyqaralyq mártebege ıe. Bir jyl ishindegi reıs sany - 1700. Jetkiziletin júkterdiń, poshtanyń kólemi - 250 tonnadan astam.
