Qostanaı áýejaıynda áýege kóterilgen ushaqtyń shassı dóńgelegi órtendi
ASTANA. KAZINFORM — Oqıǵany Qazaq Air áýe kompanııasynyń baspasóz qyzmeti rastady. Tehnıkalyq tekserý júrgizý úshin óńirge arnaıy komanda jiberildi, dep habarlaıdy Kazinform tilshisi.
Vedomstvonyń málimetinshe, 2025 jylǵy 11 qazanda Qostanaı – Astana baǵytyndaǵy IQ368 turaqty reısin oryndaý kezinde Qostanaı áýejaıynda áýe kemesinde tehnıkalyq aqaý tirkelip, ushý toqtatylǵan. Áýe kompanııa aqparatyna sáıkes, keıbir jolaýshy shassı mańynda qysqa merzimdi ot ushqyny baıqalǵanyn habarlaǵan. Bul derek tehnıkalyq tekseris kezinde nazarǵa alynatyn bolady.
Atalǵan oqıǵa týraly aqparat jergilikti BAQ-ta jarııalandy.
— Qostanaıǵa aqaýdy tekserip, joıý úshin tehnıkalyq komanda jiberildi. Jolaýshylarǵa qonaqúıge ornalastyrý, bılet qunyn qaıtarý nemese basqa reısterge aýystyrý usynyldy, — dep habarlady áýe kompanııanyń baspasóz qyzmeti.
Kompanııa ókilderi jolaýshylar men ekıpajdyń qaýipsizdigi — basty basymdyq ekenin, barlyq is-árekettiń halyqaralyq ushý qaýipsizdigi standarttaryna qatań sáıkestikte oryndalatynyn atap ótti.
Atalǵan oqıǵaǵa baılanysty Qazaqstan Respýblıkasy Kólik mınıstrligi de pikir bildirdi.
— Qazaq Air áýe kompanııasynyń Qostanaı – Astana baǵytyndaǵy reısi kezinde bolǵan avıatsııalyq oqıǵany tergeý úshin azamattyq jáne tájirıbelik avıatsııa salasyndaǵy avıatsııalyq oqıǵalar men ıntsıdentterdi esepke alý jáne tergep-tekserý qaǵıdalaryna sáıkes komıssııa qurylatyn bolady. Tergeýdi QR Kólik mınıstrliginiń Kólik oqıǵalary men ıntsıdentterin tergeý departamenti júrgizedi, — dep habarlady vedomstvo.
Aıta keteıik, Qazaqstanda eski ushaqtardy, sonyń ishinde 1981 jyly óndirisi toqtatylǵan ıAk-40 ushaqtaryn paıdalanýyn toqtatý usynyldy.