Qostanaı aýdandyq soty ǵımaratyndaǵy kisi ólimi: Kúzetshiler 5 jylǵa sottalýy múmkin
QOSTANAI. QazAqparat - Amangeldi aýdandyq soty ǵımaratynyń kireberisin baqylaıtyn Qostanaı oblysy ІІD kúzet qyzmeti basqarmasynyń kúzetshileri 5 jylǵa deıin sottalýy múmkin, dep habarlady «QazAqparat» HAA tilshisi.
Olardyń salǵyrttyǵy saldarynan 28 aqpanda sot úderisiniń qatysýshysy sot ǵımaratynda óz áıelin pyshaqtap óltirdi.
Oblystyq prokýratýrada habarlaǵandaı, qyzmetkerlerdiń salǵyrttyǵy boıynsha sotaldy tergeýdi Qostanaı oblystyq prokýratýrasy mamandandyrylǵan prokýrorlar basqarmasy júrgizedi. Olarǵa taǵylǵan aıyp QR QK 371-baby 2-bólimi boıynsha 5 jylǵa bas bostandyǵynan aıyrý jazasyn kózdeıdi.
Eske salsaq, ІІD baspasóz qyzmetinde qylmysker sotqa pyshaqty qalaı alyp ótkenin anyqtaý úshin qyzmetkerlerge qatysty qyzmettik tekserý bastalǵanyn habarlanǵan.
Budan buryn habarlanǵandaı, 28 aqpanda tańerteń neke buzý úderisine qatysýǵa kelgen Bekibaev sot bastalar aldynda áıelimen sózge kelip qalyp, etiginiń qonyshynan pyshaq alyp shyǵyp, áıeline birneshe jerden pyshaq jaraqatyn salady.
Er adam ony toqtatpaqshy bolǵan sot prıstavyna belsendi qarsylyq kórsetti. Ony aıǵaı-shýdy estip júgirip jetken sot tóraǵasy men kúzet qyzmetiniń qyzmetkeri toqtatty.
Jedel járdem kóligi áıeldi aýrýhanaǵa jetkizdi, alaıda onyń ómirin saqtap qalý múmkin bolmady. Jubaıynyń denesine 30-dan astam pyshaq jaraqaty salynǵan. Sottyń baspasóz qyzmeti ustalǵan er adam Amangeldi orta mektebiniń dene shynyqtyrý pániniń muǵalimi ekenin habarlady.
