Qostanaı astyǵynyń deni Ózbekstanǵa eksporttaldy
QOSTANAI. QazAqparat - Qostanaıda 2,1 mln tonna astyq eksportqa shyǵaryldy, dep habarlaıdy QazAqparat «QTJ» - Júk tasymaly» AQ Qostanaı bólimshesiniń dırektory Berik Qaıdarovqa silteme jasap.
Qostanaı oblysynyń sharýalary eksportqa shyǵatyn bıdaıdy konteınerlermen kóbirek tasymaldaıdy. Jyl basynan beri Zaaıatsk, Qostanaı, Esil beketteri arqyly 7 myń tonnadan astam astyq jóneltilgen. «QTJ» -Júk tasymaly» AQ Qostanaı bólimshesiniń dırektory Berik Qaıdarovtyń aıtýynsha, konteınermen ónim tasymaldaý - dittegen jerge shuǵyl túrde jetkizýdiń eń tıimdi tásili.
«Toǵyz aıdyń ishinde 980 myń tonna qaıta óńdelgen un tasymaldanǵan. Onyń 812 myń tonnasy - eksport. Búginde 2,8 mln tonna astyq vagondarǵa tıeldi. Bul ótken jylǵy osy merzimmen salystyrǵanda 51%-ǵa artyq. Munyń 2,1 mln tonnasy eksporttyń enshisinde. Esil jáne Tobyl tárizdi iri temirjol beketteri arqyly kúnine júzdegen vagon jan-jaqqa attanyp jatyr. Toǵyz aıdyń ishinde 200 vagonnan astam astyq syrtqa shyǵaryldy. Onyń 119-y óz elimizdiń ishinde, 48-i Ózbekstanǵa, 21-i Ortalyq Azııa elderine, 6-y Reseı men Ázirbaıjanǵa, ekeýi Grýzııaǵa jetkizildi», - deıdi Berik Qaıdarov.
Buǵan deıin qostanaılyq astyqtyń alǵash ret Afrıkaǵa jóneltilgenin habarlaǵanbyz.
Qazir Aýǵanstan, Iran jáne Irak memleketterine astyq ónimderin balamaly ádispen tasymaldaý joldary qarastyrylyp jatyr. Ónim aldymen Qazaqstandaǵy «Bolashaq» ótkizý beketinen Túrkimenstan arqyly, odan Imamnazar, Akına, Serhetabad jáne Sarahs beketterine tasymalanady.
«Júk tasymaldaýǵa qajetti vagondar jetkilikti. Onyń ústine jańa vagondarymyz bar. Endeshe, tasymal máselesinde eshqandaı kedergi týyndamaıdy. Jyl sońyna deıin taǵy 400 myń tonna júk tasymaldaý josparlanyp otyr. Bul áýeli tutynýshylarǵa áleýmettik mańyzy bar júkterdi dál ýaqytynda, jetkilikti kólemde jetkizýge septigin tıgizedi»,-deıdi fılıal dırektory.
Berik Qaıdarov qostanaılyqtar kómirden qysylmaıdy dep otyr. Kommýnaldyq-turmystyq kásiporyndar men turǵyndar qatty otynmen 100 paıyz qamtamasyz etildi.
Ústimizdegi jyldyń qańtar-qyrkúıek aılarynda óńirge 160 myń tonna kómir ákelindi. Onyń syrtynda tutynýshylar 300 myń tonna qatty otynǵa qol jetkizdi. Máselen, Rýdnyıdaǵy jylý-energetıkalyq ortalyqtyń qoımasynda ádettegi mólsherden 2-3 ese artyq kómir qory saqtaýly.
