«Qostanaı-Almaty» baǵytyndaǵy poıyz jańartylady
QOSTANAI. QazAqparat - Qostanaı-Almaty aralyǵyndaǵy poıyz qyzmetin baqylaýshy «Túrksib-Astana» JShS jańa kýpe vagondaryn satyp alady, dep habarlaıdy QazAqparat tilshisi.
«Túrksib-Astana» JShS dırektory Vladımır Rojkonyń aıtýynsha, bıyl Reseıden 14 jańa kýpe vagony satyp alynady.
«Qazir eki tarap arasynda kelissózder júrgizilip jatyr. Maýsym aıynda alǵashqy vagondar jetkizilýi tıis. Oǵan deıin «Qostanaı-Almaty» baǵytyndaǵy «043» poıyzy paıdalanylady. Búginde barlyq vagondardy jańartýǵa shamamyz joq. Degenmen, endigi jyly qarjylyq jaǵdaı rettelse, bul máseleniń de sheshimi tabylady», - dedi Rojko agenttik tilshisine.
Basshynyń sózinshe, byltyr seriktestik 26 platskart, 6 kýpe vagonyn satyp aldy.
«Bizde barlyǵy 100 vagondaı bar. Byltyrdan beri vagondardyń ishki ıntereri men dıvandary, jýyn bólmesi jańartyldy. Perdeler ornatylyp, qysqa tolqyndy peshter satyp alyndy. Budan ózge aǵymdaǵy jyly jańa 14 kýpe vagony aýa baptaý júıesimen jabdyqtalady», - deıdi Rojko.
