Qostanaı ákiminiń burynǵy orynbasary jarty aıdan keıin bostandyqqa shyǵýy múmkin
QOSTANAI. QazAqparat - Qostanaı ákiminiń burynǵy orynbasary Frýnzık Arakelıan sot arqyly ózine taǵaıyndalǵan jazany jeńildetip aldy, dep habarlaıdy «QazAqparat» HAA tilshisi.
Qostanaı №2 sotynyń sýdıasy Orazbaı Satybaldy sybaılas jemqorlyq úshin sottalǵan burynǵy sheneýniktiń jaza óteıtin qalǵan merzimin aıyppulǵa aýystyrý týraly ótinishhatyn qanaǵattandyrdy. Temir torda áli 547 kún otyrýy tıis Arakelıan endi 310 myń 853 teńge (4 ótelmegen kún úshin 1 AEK) kóleminde aıyppul tóleýge mindetti.
Odan bólek, sot keńsesiniń aıýynsha, Arakelıan ózi alǵan parany (300 myń teńge) qaıtarǵan jáne sot shyǵynyn (28 myń teńge) tólegen. Onyń qorǵaýshysy sottalýshy otyrǵan túzetý mekemesinen ákelgen oń minezdemelerdi sotqa kórsetti. Mundaı jaǵdaıda prokýratýra Arakelıan ótinishhatyna qarsylyq kórsetýdi qajet dep tappady. Onyń ústine, qadaǵalaýshy organ qabyldanǵan sheshimge qarsy shyǵý quqyǵyna ıe. Eger esh qarsylyq bolmasa, Arakelıan 1 aqpan kúni bostandyqqa shyǵýy múmkin.
Aıta keteıik, bıylǵy jyldyń 7 sáýirinde Qostanaı qalasynyń №2 sotynyń úkimimen qala ákiminiń burynǵy orynbasary Arakelıan QR QK-niń 366-baby, 3-tarmaǵy jáne 2-tarmaqshasy boıynsha (para alý), oǵan múlkin tárkileı otyryp, 7 jylǵa bas bostandyǵynan aıyrý jazasy berildi. Qostanaı oblystyq sotynyń qylmystyq ister jónindegi sot alqasynyń 10 maýsymdaǵy qaýlysymen QR QK-niń 55-baby 4-tarmaǵy negizinde oǵan berilgen 7 jyl bas bostandyǵynan aıyrý týraly jaza 3 jyl 6 aıǵa deıin qysqartyldy. Al ótken jyldyń jeltoqsan aıynda «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq týraly» QR Zańyna sáıkes, sot úkimimen berilgen jazanyń aıaqtalmaǵan bóligi taǵy 6 aı 15 kúnge qysqartylǵan edi. Memlekettik qyzmetke qatysy bar jumyspen ómir boıy aınalyspaý quqyǵy óz kúshinde qaldy.
